Aprelin 18-də Opera Studiyasında Azərbaycanın böyük bəstəkarı Üzeyir Hacıbəylinin 140 illik yubileyinə həsr olunmuş konsert proqramı təşkil edilib.

Konsertlə bağlı Əməkdar artist Nicat Kazımov xalqcəbhəsi.az-a məlumat verib: “Bildirim ki, konsert Üzeyir Hacıbəyli adına Bakı Musiqi Akademiyasının “Solo oxuma və opera hazırlığı” kafedrasının tələbələrinin ifasında təqdim edildi. Konsertdə çıxış edənlər opera sinfindən mənim və Safina Zeynəb Dayanşayevnanın tələbələri idi. Qeyd edim ki, bu konsert Xalq artisti Xuraman Qasımovanın təşəbbüsü ilə keçirildi və biz konserti Üzeyir Hacıbəylinin 140 illik yubileyinə həsr etdik. Ona görə də konsertdə Üzeyir bəyin musiqilərindən də istifadə olundu. 4 nömrə Üzeyir bəydən idi, yəni “Leyli və Məcnun”, “Firuzə” operasından “Firuzənin ariyası” və “Arşın mal alan”dan iki ariya – Əsgər bəyin ariyası və Gülçöhrənin ariyası ifa olundu”.

Bildirək ki, konsert proqramında C.Verdi – “Traviata”, F.Əmirov –“Sevil”, Ü.Hacıbəyli – “Arşın mal alan”, R.Koççante – “Notre dame de Paris”, P.Çaykovski – “İolanta”, V.A.Mosart – “Fiqaronun toyu”, S.Raxmaninov – “Aleko”, T.Quliyev – “Qızılaxtaranlar”, P.Çaykovski – “Yevgeniy Onegin”, Ü.Hacıbəyli - “Firuzə”, Ü.Hacıbəyli – “Leyli və Məcnun” əsərlərindən səhnələr nümayiş olunub.

Qeyd edək ki, konsert izləyicilər tərəfindən çox böyük maraq və alqışlarla qarşılanıb.

Röya İsrafilova