Azərbaycan Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Tətbiqi Sənət Nümunələrinin Qorunmasına və Təbliğinə Yardım” İctimai Birliyi tərəfindən həyata keçirilən "Qərbi Azərbaycanın sənət nümunələri" adlı layihənin icrası uğurla davam edir.

Bu barədə Xalqcebhesi.az-a İctimai Birlikdən məlumat verilib.

Təşkilat Azərbaycan Dövlət Pedaqoji Universiteti və orada fəaliyyət göstərən Qərbi Azərbaycan Araşdırmalar Mərkəzinin təşkil etdiyi konfrans və sərgi, İstanbulda keçirilən 28-ci Avrasiya İqtisadi Zirvəsi, Mərmərə Qrupu Strateji və Sosial Araşdırmalar Vəqfinin 40 illik yubiley tədbirləri, eləcə də “Sərdarlılar” ailəsinin yaratdığı Sərdar Sandıq Ocağında keçirilən “Türk dünyasının ortaq dəyərləri – mədəni irs nümunələrimiz” adlı sərgi və konfranslarda təmsil olunub.

Həmçinin Qeyri-Hökumət Təşkilatlarına Dövlət Dəstəyi Agentliyinin təşkil etdiyi “Qərbi Azərbaycana qayıdış” mövzusunda brifinq çərçivəsində “Urudum”, “Göyçəm”, “Dərələyəzim”, “Sonuncu Xan”, “İrəvanım”, “İpək Yolu” və “Keşkəndim” adlı sandıqça və mücrülər nümayiş olunub.

Layihəyə əsasən, İctimai Birlik Qərbi Azərbaycan coğrafiyasında tarixən azərbaycanlılara məxsus yer adlarını, bu ərazidə formalaşmış ənənələrə əsaslanan mədəni irs nümunələrini, memarlıq incilərini və daş abidələrin xarakterik elementlərini əks etdirən 12 yeni dekorativ-tətbiqi sənət nümunəsinin yaradılmasını və onların tanıdılmasını təmin etməlidir.