“Amerika Birləşmiş Ştatları tərəfindən təklif olunan yeni sanksiyalar paketi həm ağırlığı, həm də əhatə dairəsinə görə əvvəlkilərdən ciddi şəkildə fərqlənir”.

Bu sözləri deputat Rizvan Nəbiyev Xalqcebhesi.az-a açıqlamasında deyib.

Deputat bildirib ki, ABŞ administrasiyası xüsusilə Rusiya ilə ticarət edən, o cümlədən xammal idxalına əsaslanan ölkələrə qarşı ikinci dərəcəli sanksiyaları gündəmə gətirmək niyyətindədir:
“Vaşinqtonun məqsədi Moskva ilə aparılan danışıqlarda əlavə təzyiq mexanizminə sahib olmaqdır. ABŞ Prezidenti bu aləti danışıqların gedişinə uyğun olaraq istənilən vaxt masa üzərinə qoymaq imkanını özündə saxlamaq istəyir. Bu, Rusiyaya qarşı diplomatik prosesdə daha sərt mövqe formalaşdırmaq niyyətindən xəbər verir”.

Rizvan Nəbiyevin sözlərinə görə, yeni sanksiyaların məqsədi Rusiyanın hərbiləşmə siyasətini təmin edən əsas maliyyə mənbələrini məhdudlaşdırmaqdır:
“Rusiyanın əsas gəlirləri neft, qaz və digər xammal növlərindən formalaşır. Sanksiyalar bu sahələri hədəfə almaqla Rusiyanın iqtisadi imkanlarını ciddi şəkildə qapadır və hərbi büdcəni zəiflətməyə yönəlir”.

Deputat qeyd edib ki, ABŞ Rusiyaya təzyiqi artırmaqla Ukrayna müharibəsində diplomatik dönüş yaratmaq istəyir:
“Donald Tramp daha seçkilərdən əvvəl bu təzyiq mexanizmlərini işə salacağını bildirmişdi. Seçkilərdən sonra Ukrayna və Rusiya rəhbərləri ilə aparılan intensiv danışıqlardan nəticə əldə olunmaması isə administrasiyanı sanksiya paketini əsas təsir vasitəsi kimi masada saxlamağa vadar edir. Hazırkı mərhələdə bu paket Rusiyaya qarşı istifadə edilə biləcək ən təsirli siyasi alətlərdən biridir”.

Günel Elxan