“Azərxalça” ASC-nin Ağstafa filialı üç ilə yaxındır fəaliyyət göstərir. Prezident İlham Əliyevin bu il martın 4-də Ağstafa rayonuna səfəri zamanı “Azərxalça” ASC-nin Ağstafa filialı ilə tanışlığı bu müəssisənin kollektivi üçün yeni bir stimul oldu. Burada yaradılan yüksək şərait insanların rahat və əlverişli şəraitdə işləməsindən xəbər verir. Bu filial, həm də regionların sosial-iqtisadi inkişafı fonunda yeni iş yerlərinin açılmasının ən yaxşı göstəricilərindəndir.
Hazırda müəssisədə 80 toxucu və 12 inzibati işçi işlə təmin olunub. “Azərxalça”nın Ağstafa filialının direktoru Raya Eyyubova bildirib ki, işlədikləri üç il müddətində 300-dən çox xalça toxunub. “Emalatxanamızda həm gənc, həm də yaşlı nəslin nümayəndələri çalışır. Müəssisənin fəaliyyətə başlaması qadınların sevincinə səbəb olub. Çünki burada onlar həm işlə təmin olunub, həm də bu sənəti yaşadırlar”, - deyə R.Eyyubova əlavə edib.
Müəssisədə çalışanlardan gənc toxucular içərisində elələri var ki, onlar sənətin sirlərini nənələrindən, analarından öyrəniblər, “Azərxalça”nın təşkil etdiyi tədris-hazırlıq kurslarında isə bacarıq və vərdişlərini təkmilləşdiriblər. Elə buna görə də burada bir-birindən gözəl xalçalar toxuyurlar. Bəzi işçilər isə xalça toxumağı "Azərxalça"nın tədris-hazırlıq kurslarında öyrəniblər.
Emalatxanadakı 43 dəzgahda Azərbaycan xalçaları toxunur. Əsasən Ağstafa, Qazax və Tovuz rayonlarının yaşayış məntəqələrindəki orijinal xalça çeşnilərinin toxunmasına üstünlük verilir. Bu çeşnilər dünya muzeylərində, şəxsi kolleksiyalarda mühafizə olunan, həmçinin respublikamızın ayrı-ayrı bölgələrindən toplanılan qədim və orijinal xalçalar əsasında "Azərxalça"nın rəssamları tərəfindən hazırlanıb. Filialda satış salonu da fəaliyyət göstərir. Salonun pavilyonunda ornamentlərlə bəzədilmiş xalçalar, kəlağayılar, suvenirlər və başqa əşyalar yer alıb. Binada toxuculuq emalatxanası, satış salonu ilə yanaşı, rəssam otağı, yeməkxana, tibb otağı və digər bölmələr də yaradılıb.