Səfir Erkan Özoral: "Azərbaycan FETÖ-yə qarşı mübarizədə daim Türkiyəyə dəstək verib"


"Bildiyiniz kimi, FETÖ terror təşkilatı Türkiyənin xaricində də şəbəkələşib. Türkiyə xaricində də FETÖ-ya qarşı layiqli mübarizə aparılır. Azərbaycan bu mübarizədə daim Türkiyəyə dəstək verib".
Bunu Türkiyənin Azərbaycandakı səfiri Erkan Özoral 15 iyul 2016-cı ildə Türkiyədə dövlət çevrilişinə cəhdin ildönümünə həsr olunmuş mətbuat konfransında çıxışı zamanı deyib.
Səfir qeyd edib ki, 15 iyul çevrilişə cəhd gecəsi Azərbaycan prezidenti İlham Əliyev dərhal Türkiyə prezidenti Rəcəb Tayyib Ərdoğana zəng edib: "Türkiyənin gücü Azərbaycanın gücü, Azərbaycanın gücü Türkiyənin gücüdür. Terrora qarşı mübarizədə Azərbaycanı yanımızda görməklə böyük güc hiss edirik".
Diplomat dövlət çevrilişinə cəhd zamanı 250 nəfərin şəhidlik zirvəsinə ucaldığını xatırladıb: "Həmin gecə 2000-dən artıq vətəndaşımız isə yaralanıb. O gecə çevrilişə cəhd göstərənlərin törətdikləri vəhşiliyin tayı-bərabəri yox idi. 15 iyul dönüş nöqtəsi oldu. Dövlət çevrilişinə cəhd edənlər insanlıq hisllərini itirərək, sadəcə Pensilvaniyadan əmr almaqla robot kimi hərəkət ediblər".
Erkan Özoral qeyd edib ki, 15 iyul Türkiyə demokratiyası üçün mühüm sınaq olub: "Türkiyə vətəndaşları tək ürək, tək bədən oldu. Çevrilişə cəhd edənlər
özünü Məsih, peyğəmbər elan etmiş bir adamın qullarına çevriliblər"
Jurnalistlərin suallarını cavablandıran Türkiyə səfiri Fəthullah Gülənçi terror qrupunun ötən ilki hərbi çevriliş cəhdinədək olduğu qədər güclü olmadığını deyib.
Onun sözlərinə görə, çevriliş cəhdindən sonra bu hərəkatla əlaqəli olan 130-140 min nəfər saxlanılıb, onlardan 45 min nəfərinə həbs cəzaları verilib.
Səfir bildirib ki, FETÖ terror təşkilatının lideri Fətullah Gülənin Türkiyəyə ekstradisiya olunması ilə bağlı danışıqlar davam edir.
Səfir deyib ki, bu məsələdə Türkiyənin müttəfiqləri öz üzərlərinə düşən öhdəlikləri yerinə yetirmirlər: "Təəssüf ki, biz bu məsələdə digər dövlətlərdən Azərbaycan dövlətinin göstərdiyi həssaslığı görmürük".
Erkan Özoral qeyd edib ki, dövlət çevrilişinə cəhddən sonra Türkiyə iqtisadiyyatı daha yaxşı inkişaf edib, terrora qarşı layiqli mübarizə aparılıb.