Orxan Camal və digər rusiyalı jurnalistlərin öldürülmə səbəbi təsdiqlənib Siyasət

Orxan Camal və digər rusiyalı jurnalistlərin öldürülmə səbəbi təsdiqlənib

Rusiyalı jurnalistlər – Orxan Camal, Kirill Radçenko və Aleksandr Rastorquevin soyğunçuluq məqsədilə öldürülməsi versiyası təsdiqini tapıb.
Bu barədə Rusiya İstintaq Komitəsi sədrinin müavini İqor Krasnov “Kommersant” qəzetinə müsahibəsində bildirib.
O deyib ki, hadisənin araşdırılması zamanı məlum olub ki, qətl həmin regionda sistemli ağır cinayətlər törədən Mərkəzi Afrika Respublikası (MAR) və ya yaxın ölkələrin sakinləri tərəfindən soyğunçuluq məqsədilə törədilib.
İ. Krasnovun sözlərinə görə, O. Camal, K. Radçenko və A. Rastorquev 2018-ci il iyulun 28-də MAR-a turist vizası ilə səfər ediblər:
“Berenqo şəhərində rusiyalı hərbi təlimatçıların düşərgəsini ziyarətə buraxılmayandan sonra, ölkə boyu gecə hərəkətin təhlükəli olması barədə xəbərdarlığa baxmayaraq, jurnalistlər naməlum şəxslə görüşmək üçün iyulun 30-da Bambari şəhərinə gediblər. Bundan sonra jurnalistlərin olduğu avtomobil naməlum qaradərili silahlı şəxslər tərəfindən saxlanılıb. Silahlı şəxslər jurnalistlərdən avtomobili tərk etməyi və əşyalarını, o cümlədən fotokamera və videokameranı verməyi tələb ediblər. Jurnalistlər isə bundan imtina etdikdən sonra cinayətkarlar onları güllələyiblər”, - deyə Rusiya İstintaq Komitəsi sədrinin müavini vurğulayıb.
Qeyd edək ki, 2018-ci ilin yayında Orxan Camal, Aleksandr Rastorquyev və Kirill Radçenko MAR-da fəaliyyət göstərən qeyri-formal silahlı qrup olan “Vaqner” barədə film çəkmək üçün həmin ölkəyə səfər ediblər. Onları həmin qrupun yerləşdiyi bazaya, təlim məşq düşərgəsinə buraxmayıblar. Jurnalistlərin MAR-da fəaliyyət göstərmələri üçün akkreditasiyaları da olmayıb. Jurnalist qrupunun MAR-na "Vaqner" barədə film çəkmək üçün rusiyalı müxalif milyarder Mixail Xodorkovski tərəfindən göndərildiyi bildirilib.
Xatırladaq ki, Rusiyanın tanınmış hərbi jurnalisti, ictimai xadim Orxan Camal görkəmli ictimai-siyasi xadim, islamşünas Heydər Camalın oğludur.