Gürcüstanın Oni bələdiyyəsindəki Şovi kurort zonasında baş vermiş torpaq uçqunu nəticəsində ölənlərin sayı 7-yə çatıb.

APA-nın Tbilisi müxbiri xəbər verir ki, bu barədə hadisə yerində jurnalistlərə açıqlama verən Gürcüstanın Baş naziri İrakli Qaribaşvili bildirib. O, xilasedicilərin ötən gün 2, bu gün isə 5 nəfərin meyitini torpaq kütləsinin altından çıxardıqlarını deyib.

Baş nazir əlavə edib ki, təbii fəlakətlə əlaqədar həftə sonu aktiv iş günü kimi davam etdiriləcək, avqustun 7-si isə Gürcüstanda matəm günü olacaq.

***

11:26

Gürcüstanda torpaq sürüşməsinin baş verdiyi Oni bələdiyyəsində daha 4 nəfərin meyiti tapılıb.

APA-nın Tbilisi müxbiri xəbər verir ki, bu barədə Gürcüstanın Daxili İşlər Nazirliyi məlumat yayıb. Bununla da təbii fəlakət nəticəsində həlak olanların sayı 6-ya çatıb.

Xatırladaq ki, dünən Gürcüstanın Oni bələdiyyəsi ərazisindəki Şovi kurort zonasının yaxınlığında baş vermiş torpaq sürüşməsi zamanı onlarla insan itkin düşüb.