Məlumata görə, Kolumbiya İnqilabçı Silahlı Qüvvələri (FARC) mənsublarının fəaliyyət göstərdiyi Cauca administrasiyasına bağlı El Plateado bölgəsində “Ədalət əməliyyatı” adlı xilasetmə əməliyyatı həyata keçirilib.

İyunun 22-də əməliyyatda saxlanılan 57 əsgər azad edilərkən, 20-dən çox şübhəli şəxs saxlanılıb.
Kolumbiyanın daxili işlər naziri Armando Benedetti X sosial media platformasında ordu və polis qüvvələrinin birgə fəaliyyəti nəticəsində əməliyyatın uğurla başa çatdığını açıqlayıb.
Səlahiyyətlilər əsgərlərin qaçırılmasına görə FARC-nin Estado Mayor Central (EMC) ilə əlaqəli Carlos Patino qrupunun məsuliyyət daşıdığını qeyd edib.

“İvan Mordisko” adı ilə tanınan Nestor Qreqorio Veranın rəhbərlik etdiyi və FARC ilə dövlət arasında sülh sazişində heç vaxt iştirak etməyən EMC, FARC-nin sözdə “Baş Qərargahı” olaraq da tanınır.
Ölkə mətbuatının məlumatına görə, 2180-i silahlı olmaqla 3500-dən çox üzvü olan EMC Venesuela və Ekvadorda, həmçinin Kolumbiyanın qərbində, mərkəzi və şərqində narkotik, qaçaqmalçılıq və qəsb yolu ilə maliyyələşməni təmin edir.