Gürcüstan Prezidenti Salome Zurabişvili Rusiya hakimiyyətinə müraciət ünvanlayıb.
Jurnalistlərə açıqlama verən Zurabişvili Rusiya hakimiyyətindən gürcü siyasətçilərin fəaliyyətinə reaksiya verməməyi xahiş edib.
“Rusiya hökumətini eskalasiyaya getməməyə çağırıram. Əgər qonşu ölkə özünün xarakterizə etdiyi radikal qüvvələrin provokasiyalarına cavab versə, bu, paradoks olacaq və bununla onların destruktiv hədəflərinə çatmalarına yardım edəcək. Qeyd etmək istəyirəm ki, bizim dinc siyasətimiz ölkə və regionda stabilliyin saxlanılması üçün yeganə yoldur. Rusiyada yaşayan vətəndaşlarımıza müraciət edirəm. Mən sizin prezidentinizəm və sizin rifahınız bizim üçün çox vacibdir. Bilirəm ki, hakimiyyət bu situasiyada mümkün olan hər şeyi edəcək ki, siz dinc və stabil yaşamağa davam edəsiniz”, - deyə o bildirib.
Qeyd edək ki, Rustavi-2-də yayımlanan “P.S.” proqramının aparıcısı Georgi Qabuniya Rusiya Prezidenti Vladimir Putinin ünvanına müxtəlif təhqiramiz ifadələr səsləndirib. Bundan sonra bir müddət öncə yaranan gərginlik daha da artıb.