"Naxçıvanın turizm potensialının tanıdılmasında medianın rolu" mövzusunda konfrans keçirilib


Azərbaycanın bir qrup KİV rəhbərinin dünən Naxçıvan Muxtar Respublikasına (MR) səfəri başlayıb.
Səfər Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİV DF) təşkilatçılığı ilə baş tutub.
20 nəfərlik nümayəndə heyəti üç günlük səfər çərçivəsində yerli KİV-in işi ilə yaxından tanış olacaq, Naxçıvanın mədəni-tarixi abidələrini ziyarət edəcək.
Nümayəndə heyətinə KİV DF-nin icraçı direktoru Vüqar Səfərli, "Yeni Azərbaycan" qəzetinin baş redaktoru, Milli Məclisin deputatı Hikmət Babaoğlu, "APA Holdinq"in prezidenti Vüsalə Mahirqızı, "Xalq qəzeti"nin baş redaktoru Həsən Həsənov, KİV DF-nin Müşahidə Şurasının sədr müavini, "İki Sahil" qəzetinin baş redaktoru Vüqar Rəhimzadə, "Ədalət" qəzetinin təsisçisi, millət vəkili Aqil Abbas, "Trend" İnformasiya Agentliyinin baş direktoru İlqar Hüseynov, "İnterfaks" İnformasiya Agentliyinin direktoru Aleksandr İvanov, "Səs" qəzetinin baş redaktoru Bəhruz Quliyev, "Bakı Xəbər" qəzetinin baş redaktoru Aydın Quliyev, "525-ci qəzetin" baş redaktoru Rəşad Məcid, "Olaylar" İnformasiya Agentliyinin baş redaktoru Yunus Oğuz, "Bizim yol" qəzetinin baş redaktoru Bahəddin Həziyev, Azərbaycan Mətbuat Şurasının sədr müavini, "Jurnalistlərin Həmkarlar İttifaqı"nın sədri Müşfiq Ələsgərli, "Xalq Cəbhəsi" qəzetinin baş redaktoru Elçin Mirzəbəyli, "Həftə İçi" qəzetinin baş redaktoru Sevinc Seyidova, "Palitra" qəzetinin baş redaktoru Namiq Əliyev, "Azernews" qəzetinin baş redaktoru Sevil Mikayılova, KİV DF-nin informasiya texnologiyaları üzrə mütəxəssisi Mirsəid Ağayev, "Movqe.az" saytının müxbiri Zülfiyyə Quliyeva daxildir.
KİV rəhbərlərinin Naxçıvana səfəri çərçivəsində Naxçıvan Dövlət Universitetində "Naxçıvanın turizm potensialının tanıdılmasında medianın rolu" mövzusunda konfrans keçirilib.
Konfransdan əvvəl tədbir iştirakçıları Heydər Əliyevin abidəsini və Heydər Əliyev Muzeyini ziyarət ediblər.
Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİV DF) icraçı direktoru Vüqar Səfərli KİV rəhbərlərinin budəfəki səfərinin əsas məqsədinin Naxçıvanın turizm potensialının tanıdılmasında medianın rolunun artırılması olduğunu deyib.
O, Naxçıvanın geniş turizm potensialına malik olduğunu bildirib: "Biz ötən ilin oktyabrında səfərimiz zamanı da Naxçıvanın tarixi və mədəni abidələrlə zənginliyinin, turizm cəlb etmək üçün böyük potensiala malik olduğunun şahidi olduq. Bu gün Naxçıvanda "Duzdağ" Fizioterapiya Mərkəzi fəaliyyət göstərir, lakin bu şəfa ocağının potensialından lazımınca istifadə olunmur. Bizim Naxçıvana səfərimizin əsas məqsədi bu cür turizm obyektlərini mediada geniş təbliğ etməklə Naxçıvana dəstək olmaqdır".
Naxçıvan Dövlət Universitetinin Jurnalistika kafedrasının müdiri Şəhla Şirəliyeva çıxışında Naxçıvanda KİV-in hərtərəfli qayğı ilə əhatə olunduğunu, azad mətbuatın inkişafı, söz azadlığının təmin olunması və informasiyanın operativ çatdırılması məsələlərinin diqqətdə saxlanıldığını deyib: "Hazırda Muxtar Respublikada "Şərq qapısı" ilə yanaşı, 8 şəhər və rayon qəzeti, 4 jurnal, universitet televiziyası və radiosu daxil olmaqla, 3 televiziya, 3 radio və 6 nəşriyyat fəaliyyət göstərir. "Universitet" televiziyası və "Naxçıvan" radiosu həftənin üç günü kabel şəbəkəsi vasitəsilə universitet şəhərciyində, eləcə də açıq formada Naxçıvan şəhərində yayımlanır".
Konfransda çıxış edən iqtisad üzrə fəlsəfə doktoru Əli Cabbarov Naxçıvanın ölkənin mühüm turizm mərkəzlərindən olduğunu bildirib: "Keçmiş SSRİ dövründə sərhədyanı region kimi xarici turistlərin üzünə bağlı olmuş Naxçıvana indi dünyanın müxtəlif yerlərindən turistlər gəlir. Turistlərə xidmət göstərən gömrük-keçid məntəqələri, ən müasir təyyarələri qəbul edən beynəlxalq hava limanı, etibarlı yol-nəqliyyat infrastrukturu, müasir standartlarına cavab verən mehmanxanalar, zəngin milli mətbəx təklif edən yeməkxana və restoranlar, qədim və zəngin tarixi-mədəni irs, turistlərin Muxtar Respublikanın hər bir nöqtəsində rahat hərəkətini təmin edən təhlükəsiz şərait turistlərin sayını artırıb. İl ərzində təxminən 400 mindən artıq turistin səyahət etdiyi Naxçıvan dövlət başçılarının işgüzar görüşlərinin, tanışlıq-maarifləndirmə, müalicə-rekreasiya, idman-sağlamlıq və dini-ziyarət məqsədli səyahətlərin məkanına çevrilib".
Ə. Cabbarov Naxçıvanın turizm potensialının tanıdılmasında medianın mühüm rol oynaya biləcəyini qeyd edib.
Konfransda "APA Holdinq"in prezidenti Vüsalə Mahirqızı, "İki Sahil" qəzetinin baş redaktoru Vüqar Rəhimzadə, "Səs" qəzetinin baş redaktoru Bəhruz Quliyev, "Palitra" qəzetinin baş redaktoru Namiq Əliyev və digərləri çıxış edərək Naxçıvanın turizm imkanlarından söz açıblar. Onlar Muxtar Respublikanın turizm potensialının daha çox təbliğ olunması üçün müxtəlif təkliflər səsləndiriblər.
Konfrans müzakirələrlə davam edib.
Qeyd edək ki, KİV rəhbərləri ötən ilin oktyabrında da KİV DF-nun təşkilatçılığı ilə Naxçıvan MR-ə iki günlük səfər etmişdi.