Neftin bir barelinin gözləndiyi kimi, yenidən 100 dollaradək bahalaşması ABŞ-ın İrana qarşı sanksiyaları nəticəsində dünya bazarının üzləşəcəyi neft itkisinin miqdarından asılıdır.
Bu barədə "Report"a "S&P Global Platts" agentliyinin baş redaktoru Nik Kolman bildirib.
Onun sözlərinə görə, bəzi ekspertlər bu itkinin gündə 1 mln. barel həddini xeyli aşacağı qənaətindədir: "Həmçinin Çinin də neft tələbatı xeyli yüksək olaraq qalır. Hazırki ticarət müharibəsinə baxmayaraq, bu ölkə ABŞ-dan xam neft idxalına rüsum qoymağa maraqlı görünmür".
Digər tərəfdən, baş redaktor volatil amillər olaraq Liviya və Venesuela ilə bağlı qeyri-müəyyən vəziyyəti, o cümlədən ABŞ-ın Venesuelaya qarşı mümkün sanksiyalarını göstərib: "Lakin bütün bunlar yenə də neft qiymətinin mütləq 100 dollar/barelə qayıdacağı demək deyil. Belə ki, yaxın vaxtlarda tələbatın çox güclü artımı güman olunmur. Məsələn, Beynəlxalq Enerji Agentliyi (IEA) 2019-cu ilin I rübündə gündəlik tələbatın cəmi 900 min barel artacağını gözləyir".
Bundan əlavə, onun fikrincə, təchizatla bağlı bir neçə pessimist faktor da mövcuddur:
Ötən həftə sonu OPEC lazım gələrsə, hasilatı artırmağa hazır olduqlarını bəyan edib. Bundan əlavə, ABŞ-ın Perm hövzəsində qazma qurğularının sayı artır. Bu həftə burada qazma qurğularının sayı 488-ə çatdırılıb ki, bu da 2015-ci ilin əvvəlindən bəri ən yüksək göstəricidir. Liviyada da gündəlik 1 mln.bareldən artıq hasilata dönmələrinin əlamətləri sezilir. Qiymətə təsir edən faktorlar çoxdur, buna görə də düşünürəm ki, indi neft qiymətləri barədə konkret proqnoz vermək çətindir, amma hər halda bir barelin 100 dollara yüksələcəyi barədə danışmaq bir qədər tezdir.