Azərbaycanın valyuta bazarında vəziyyət stabilləşib. Bunu "NBC Bank" və "AG Bank"ın lisenziyalarının ləğv olunması ilə bağlı keçirilən mətbuat konfransında Mərkəzi Bankın İdarə heyətinin sədri Elman Rüstəmov deyib. Onun sözlərinə görə, Azərbaycan manatının məzənnəsi sabitdir və mart ayında qeydə alınan ucuz neft qiymətlərinin təzyiqi hazırda tam aradan qaldırılıb. Bundan başqa, monetar sabitliyin təmin olunması üçün vacib addımlar atılır. Yanvar-aprel aylarında orta inflyasiya üç faiz təşkil edib və bu Mərkəzi Bankın müəyyən etdiyi hədəf çərçivəsindədir. İnflyasiyanın ilin sonunadək bu çərçivə daxilində qalacağı gözlənilir.
Kreditlərin restrukturizasiyası üçün müraciətlərin həcmi 550 milyon manata çatır. Mərkəzi Bankın sədrinin sözlərinə görə, mayın əvvəlinədək ölkədə kreditlərin restrukturizasiyası üçün ümumilikdə 549 milyon manat məbləğində 48 min müraciət qəbul edilib və onlardan yalnız 15-i müsbət cavab almayıb. Bütün müraciətlərin təxminən 91 faizi biznes kreditlərə, 4 faizi istehlak kreditlərinə, 5 faizi isə ipoteka kreditlərinə aiddir. Bu günədək müraciətlərin 37 faizdən çoxuna baxılıb.