Asim Mollazadə: "Çünki Ermənistan öz təcavüzkar siyasətinə son qoymaq istəmir"

"Ermənistan-Azərbaycan cəbhəsində gərginlik əslində heç vaxt bitməyib. Çünki Ermənistan öz təcavüzkar siyasətinə son qoymaq istəmir". Bunu millət vəkili Asim Mollazadə deyib. O bildirb ki, Ermənistan demək olar ki, tam özəlləşdirilib, amma onun arxasında dayanan qüvvənin təsiri ilə vəziyyəti gərginləşdirərək Azərbaycana təzyiq göstərmək istəyir: "Azərbaycan bir neçə istiqamətdə, ilk növbədə enerji sahəsində Avropa ilə əməkdaşlıq edir. Ölkəmizin böyük nəqliyyat layihələri var. Bütün bunlar isə Ermənistanı və onun havadarlarını narahat edir. Bu səbəbdən də atəşkəs rejimini mütamadi olaraq pozurlar". A.Mollazadə Ermənistanda qarşıdan gələn seçkilərə də toxunub: "Bu ölkədə heç vaxt seçki keçirilməyib. Sadəcə seçki şouları olub. Görünür, bu şouları daha drammatik keçirmək üçün hərbi sahədə nəyəsə qadir olduqlarını nümayiş etdirməyə çalışırlar. Amma əslində yenə də qeyd edirəm ki, Ermənistanın atəşkəsi pozmasının əsas səbəbi Azərbaycana təzyiq göstərməkdir".