Kəlbəcərdə ermənilər tərəfindən girov götürülən Dilqəm Əsgərovun oğlu Kürdoğlu Əsgərov ATƏT-in Varşavada keçirilən sammitində çıxış edib.
Kürdoğlu Əsgərov çıxışı zamanı atasının Kəlbəcərdə ermənilər tərəfindən oğurlandığını, hazırda səhhətinin ağır olduğunu deyib.
"Artıq 7 aydır atamdan heç bir xəbər yoxdur. Sonuncu dəfə mart ayında atamdan məktub almışıq. Səhhətində ciddi problemlər var, ürəyində, başında və belində şiddətli ağrılar var. 2014-cü ildə atam Kəlbəcərdə nənəmin qəbrini ziyarət etməyə getmişdi və erməni əsgərləri tərəfindən oğurlandı. O zaman atamın çəkisi 95 kiloqram idi, indi isə 45 kiloqramdır.
Bizim ailəmiz çox pis vəziyyətdədir. Biz hələ də bilmirik ki, atamı niyə həbs ediblər. Onun heç bir günahı yoxdur. Atam xəstə, yaşlı adamdır. Ailəmiz 4 ildir ki, başsız qalıb. Hər dəfə atamdan məktub alanda çox böyük stress keçiririk. Sizin hamınızın övladları var. Axşam evdə uşaqlarınızla vaxt keçirirsiz. Mən də atamı görmək istəyirəm, atamla oturub söhbət etmək istəyirəm. İstəyirəm ki, ad günümdə atam yanımda olsun. Burada çox böyük diplomatlar və səfirlər əyləşib. Qlobal məsələləri müzakirə edirsiz. Sizdən xahiş edirəm ki, atam Dilqəm Əsgərovun tezliklə azadlığa çıxmasına çalışasınız. Çünki, atamın heç bir günahı yoxdur. Günahsız insanların girovluqda saxlanılması doğru deyil. Və siz bunu yaxşı bilirsiniz".
Qeyd edək ki, sammitdə 57 ölkənin diplomatları, həmçinin insan haqları təşkilatları və media mənsubları iştirak edir.