"Trans-Anadolu (TANAP) təbii qaz boru kəməri Türkiyənin təbii qaza olan tələbatının 10 faizdən çoxunu təmin edəcək".
Anadolu agentliyi xəbər verir ki, bu barədə Türkiyənin energetika və təbii sərvətlər nazirinin müavini Alparslan Bayraktar bildirib. O qeyd edib ki, Azərbaycan və Türkiyə, eləcə də qonşu Gürcüstan regionun inkişafı, rifah və dinclik üçün belə böyük layihənin həyata keçirilə bilinəcəyini bütün dünyaya nümayiş etdirdilər: "TANAP rekord sayıla biləcək müddətdə tamamlanıb. İyunun 12-də isə Azərbaycan və Türkiyənin ev sahibliyi istismar müddəti 49 il olan TANAP istifadəyə verilib. TANAP Türkiyənin enerji təhlükəsizliyinə töhfə verəcək və enerji təchizatı mənbələrinin şaxələndirilməsinə də köməkçi olacaq".
TANAP ilə tarixdə ilk dəfə Azərbaycan təbii qazının Avropa ölkələrinə çatdırılacağını deyən A.Bayraktar bildirib ki, bundan başqa, TANAP Türkiyənin bölgədəki strateji əhəmiyyətini daha da artıracaq: "Türkiyənin təbii qaza olan tələbatının 10 faizdən çoxunu təmin edəcək TANAP boru kəməri mənbələri şaxələndirmək baxımından da xüsusi əhəmiyyət kəsb edir. TANAP boru təminatı, tikinti və mühəndislik kimi sahələrdə də Türkiyə iqtisadiyyatına böyük töhfələr verib. Layihənin icra edilməsi enerji təhlükəsizliyi və məşğulluğun təmin edilməsi ilə yanaşı, boru kəmərinin keçdiyi bölgələrdə əhaliyə dəstəyin göstərilməsinə də səbəb olub. Layihənin icrası zamanı ətraf mühit, səhiyyə, heyvandarlıq və təhsil kimi sahələrdə çox əhəmiyyətli investisiyalar reallaşdırılıb".