Güney Azərbaycanın Zəncan Vilayətinin (ostan) su və kanalizasiya şirkətinin (şirkət-i ab və fazlab) məsulu (müdir amil) bu vilayətin içməli su problemi barədə jurnalistlərə danışıb.
Müslim Purnüsrət deyib ki,"hazırda Zəncan vilayətində içməli su problemi yaşanır, bunun üçün hər kəs məsrəf etdiyi suyun miqdarına diqqət yetirməlidir. Əhali suyu düzgün məsrəf etməklə bu problemin həllinə yardımçı ola bilər, əks halda ciddi su qıtlığı ilə üz-üzə qalacayıq. O gün keçdikcə bu problemin böyüdüyünü təəssüflə qeyd edərək, Zəncan Vilayətində içməli suyun məsrəfinin artdığını da diqqətə çatdırıb."
M.Purnüsrət əlavə edib ki, Zəncan kəndlərinin 355-də içməli su qıtlığı yaşanır və bu o deməkdir ki, Zəncanda 10 min ailə su problemindən əziyyət çəkir.
Xatırladaq ki, qeyd etdiyimiz problem Güney Azərbaycanın digər bölgələrində də yaşanır. Yerli məsulların əksəriyyəti əhalinin su qıtlığından əziyyət çəkdiyini və bu vəziyyətə etiraz etdiklərini bildirirlər. Dövlət tərəfindən isə problemin aradan qaldırması üçün ciddi bir tədbirin alınması müşahidə olunmur.