Nazir müavini: "Bu gün Mədəniyyət Nazirliyində bu məsələyə baxılmır"

Mədəniyyət və Turizm Nazirliyi Azərbaycan Xalq Cümhuriyyətinin banisi Məhəmməd Əmin Rəsulzadəyə abidə qoyulub-qoyulmayacağı ilə bağlı məsələyə aydınlıq gətirib. Mədəniyyət və turizm nazirinin müavini Vaqif Əliyev APA-ya açıqlamasında deyib ki, Milli Elmlər Akademiyasından, digər əlaqədar təşkilatlardan, siyasi və ictimai qurumlardan nazirliyə çoxlu təkliflər daxil olub və Rəsulzadənin abidəsi ilə bağlı məsələ də qaldırılıb.
Nazir müavini xatırladıb ki, Bakıda Xalq Cümhuriyyətinin qurucularına abidə qoyulub və dövlət başçısı hər il 28 may günü o abidəni ziyarət edir: "Əgər gələcəkdə Azərbaycan Demokratik Respublikasının qurucularına - Məhəmməd Əmin Rəsulzadə, Fətəli Xan Xoyski, Nəsib bəy Yusifbəyli, Əlimərdan bəy Topçubaşov və digərlərinə ayrı-ayrılıqda abidə qoyulması məsələsi qaldırılsa, buna baxıla bilər. Onlara ümumi abidə qoyulması barədə də təklif daxil olur, belə abidə daha möhtəşəm ola bilər. Ancaq bu gün Mədəniyyət Nazirliyində təkcə Rəsulzadəyə abidə qoyulması məsələsinə baxılmır".