Gürcüstan müsəlmanları Fransa prezidentinə etiraz edirlər Hadisə

Gürcüstan müsəlmanları Fransa prezidentinə etiraz edirlər

Fransa prezidenti Emmanuel Makron Həzrəti Məhəmməd (s) peyğəmbərin karikaturalarını yayımlamaq barədə vədlər verib. Bu addım və Həzrəti Məhəmməd Peyğəmbərə qarşı hörmətsizliyi leqallaşdırıb bəraət qazandırmaq bütün müsəlman ölkələri kimi, Gürcüstanda yaşayan müsəlmanların da narahatlığına səbəb olub.

AZƏRTAC xəbər verir ki, bu sözlər Gürcüstan Müsəlmanları İdarəsinin (GMİ) məsələ ilə bağlı etiraz bəyanatında qeyd olunub.

GMİ-nin şeyxi, hacı Ramin İgidov bildirib ki, Gürcüstan ruhaniləri Fransa Prezidentinin bu çağırışlarını qətiyyətlə pisləyirlər. Onlar hesab edirlər ki, İslam dininə qarşı düşmənçilikdən xəbər verən məsuliyyətsiz rəftar dinlərarası münasibətlərin, tolerantlığın sarsılmasına və islamofobiyanın yayılmasına səbəb olacaq.

Radikal dindarları bəhanə edərək milyonlarla müsəlmanın müqəddəs şəxsiyyətinin, sevimli Peyğəmbərinin təhqirinə izn vermək bütün İslam ümmətinə hörmətsizlik deməkdir.

Emmanuel Makronun “Bu gün İslam dünyanın hər yerində böhran yaşayan bir dindir” fikrini əsassız ittiham hesab edir və qətiyyətlə pisləyirik”, - deyə bəyanatda qeyd olunur.

R.İgidov bildirib ki, bəyanat müxtəlif dillərə tərcümə olunaraq yayılacaq və Fransa Prezidentinə göndəriləcək.