“Zəngəzur dəhlizinin Azərbaycana konkret nə qədər gəlir gətirəcəyi ilə bağlı hazırda dəqiq hesablamalar mövcud deyil və bunu hələ dövlət qurumları da tam müəyyənləşdirə bilməyib”.

Bunu iqtisadçı ekspert Xalid Kərimli “Xalqcebhesi.az”-a açıqlamasında bildirib.

Onun sözlərinə görə, bu layihə təkcə dəmir yolu xətti ilə məhdudlaşmır, eyni zamanda quru yük daşımalarını və gələcəkdə enerji koridoru funksiyasını da əhatə edəcək:
Hazırda məlum olan əsas göstərici illik təxminən 15 milyon ton əlavə yükdaşıma imkanının yaranmasıdır və bu da yalnız proqnoz xarakteri daşıyır. Gəlirin həcmi daşımaların qiymətindən, bazarın genişlənməsindən və yüklərin faktiki olaraq bu marşruta yönəlib-yönəlməməsindən asılı olacaq. Ucuz daşımalar bazarı böyüdür və dövriyyəni artırır”.

Onun fikrincə, bu qədər böyük layihənin konkret maliyyə nəticələrini hesablamaq üçün çoxsaylı ssenarilər, fərziyyələr və geniş iqtisadi modellər tələb olunur: “Bu gün ‘dəhliz dəqiq bu qədər gəlir gətirəcək’ demək mümkün deyil. Yalnız xüsusi layihə qrupları uzunmüddətli proqnozlar əsasında nəticələr ortaya qoya bilər. Dəhlizin əsas üstünlükləri maliyyə gəlirlərindən daha çox strateji və iqtisadi faydalarla bağlıdır. Belə ki, Zəngəzur dəhlizi Naxçıvanın blokadadan çıxmasına, Türkiyə ilə ticarətin ucuzlaşmasına, Azərbaycanın tranzit potensialının kəskin artmasına şərait yaradacaq. Eyni zamanda, tranzit marşrutu boyunca formalaşacaq logistika mərkəzləri və anbarlar yeni iş yerlərinin açılmasına, məşğulluğun artmasına və ümumi iqtisadi inkişafın sürətlənməsinə müsbət təsir göstərəcək.

Günel Elxan