Volodimir Zelenski ilə Donald Tramp arasındakı görüş, şübhəsiz ki, müsbət bir siqnaldır. Konstruktiv dialoqun baş tutması faktının özü Ukraynanın ABŞ-ın xarici siyasətində əsas məsələlərdən biri olaraq qaldığını nümayiş etdirir. Bununla belə, danışıqlardan sonra səsləndirilən bəyanatlardan daha vacib olan məqam, həmin görüşün ardınca qəbul ediləcək konkret qərarlardır.

Bunu xalqcebhesi.az-a İntermariun İnstitutunun rəhbəri, ukraynalı politoloq Valentin Hayday deyib.

"Son illərdə Rusiya dəfələrlə nümayiş etdirib ki, diplomatik təşəbbüslərə hərbi təcavüzünü davam etdirərkən vaxt qazanmaq fürsəti kimi yanaşır. Məhz buna görə də yalnız danışıqlar prosesinə bel bağlamaq səhv olardı. Kreml öz davranışını yalnız real iqtisadi, siyasi və hərbi təzyiqlə üzləşdikdə dəyişməyə başlayır" - o, qeyd edib.

Haydayın fikrincə, bu kontekstdə, ABŞ Senatının Rusiyaya qarşı genişmiqyaslı yeni sanksiyaların tətbiqini nəzərdə tutan qanun layihəsini dəstəkləməsi xüsusilə əhəmiyyətli görünür. Əgər bu təşəbbüs bütün qanunvericilik mərhələlərini uğurla keçib qüvvəyə minərsə, o, genişmiqyaslı müharibənin başlanğıcından bəri tətbiq edilən ən sərt sanksiya rejimlərindən birinə çevrilə bilər; bura Rusiya enerji resurslarını almağa davam edən ölkələrə qarşı yüksək tariflərin tətbiqi ehtimalı da daxildir:

"Məhz bu cür addımlar Moskvanın hesablamalarını dəyişə bilər. Əgər ABŞ və müttəfiqləri sanksiya təzyiqini ardıcıl şəkildə gücləndirsələr, Ukraynaya hərbi yardımı artırsalar və Kremlin üçün davam edən təcavüzün bədəlini yüksəltsələr, o zaman diplomatik səylər həqiqətən də nəticə verə bilər. Sülhə yalnız danışıqlar yolu ilə deyil, həm də müharibəni davam etdirməyin təcavüzkar üçün həddindən artıq baha başa gəldiyi şəraitin yaradılması ilə nail olunur. Yalnız diplomatiya və real təzyiq vasitələrinin kombinasiyası müharibəyə ədalətli və davamlı son qoya bilər".

Cavid