2022-ci ildə Azərbaycan qazının Avropaya nəql olunduğu Trans-Adriatik qaz kəmərinin (TAP) illik 10 milyard kubmetr həcmində tam nəql gücünə çatacağı gözlənilir.

Trend bu barədə Beynəlxalq Enerji Agentliyinin (BEA) hesabatına istinadən məlumat verir.

Hesabata əsasən, Azərbaycan 2021-ci ilin yanvar-avqust aylarında qaz hasilatını ötən ilin eyni dövrü ilə müqayisədə 15 faiz çoxaldıb.

Qeyd olunur ki, bu ilin əvvəlindən TAP vasitəsilə Azərbaycan qazının ixracı təxminən 5,5 milyard kubmetrədək çatıb.

Qeyd edək ki, TAP boru kəməri Cənub Qaz Dəhlizinin Avropa hissəsini təşkil edir. 878 km uzunluğa malik bu kəmər Türkiyə-Yunanıstan sərhədində TANAP-a birləşir. Boru kəməri Avropada Yunanıstan, Albaniya və Adriatik dənizinin altından keçərək İtaliyanın cənubunda bitir. TAP vasitəsilə Azərbaycan qazının Avropaya nəqli 2020-ci ilin dekabrında başlayıb. Bu günədək TAP vasitəsilə qaz nəqli beş milyard kubmetrə çatıb.