“Gələn həftə Azərbaycan və Ermənistan xarici işlər nazirləri ABŞ -da növbəti dəfə görüşəcəklər. Vaşinqton iki ölkə arasında sülhün əldə edilməsi istiqamətində praktiki addımlar atır”. Xalqcəbhəsi.az xəbər verir ki, bunu politoloq Məhəmməd Əsədullazadə deyib. O, bildirib ki,
kommunikasiyaların və sərhədlərin delimitasiya -demarkasiyası üzrə işçi qrupunun iclası da keçiriləcək: “Bununla bağlı razılıq əldə edilib. ABŞ -da aparılan danışıqlar prosesindən müsbət nəticənin olacağı istisna deyil. Çünki, hər iki ölkə bir sıra məsələlərdə razılığa gəlib. ABŞ may ayından sülhün əldə edilməsi üçün real imkanlarını ortaya qoyub.
ABŞ-da nazirlərin görüşü bir neçə gün çəkə bilər. Ola bilər ki, sülh müqaviləsinin mətni hazırlansın. Sülh müqaviləsinin mətnini hazırlanması üçün müəyyən irəliləyişlər var. Ermənistan Qarabağ daxil olmaqla Azərbaycanın ərazi bütövlüyünü tanıyır. Delimitasiya və demarkasiya birgə komissiyanın iclası olacaq. Həmçinin dəmiryol xəttinin çəkilməsi ilə bağlı ilkin razılaşma da var.
Buna baxmayaraq, Ermənistan Qarabağ erməniləri ilə bağlı iddialar ortaya qoyur. Həmçinin anklavlarla bağlı məsələlərdə İrəvan öz mövqeyində düzəliş etməyib. Vaşinqton görüşündə müsbət nəticə olacaqsa, Rusiya yenidən fəallaşacaq. Qarabağda və şərti sərhəddə təxribatlara əl atacaq”.