Bu mövzuda elmi-praktik konfrans keçirilib

Azərbaycan Prezidenti yanında Dövlət İdarəçilik Akademiyası və Dövlət İmtahan Mərkəzinin (DİM) birgə təşkilatçılığı ilə "Dövlət qulluğunun aktual problemləri" mövzusunda elmi-praktik konfrans keçirilib.
Dövlət İdarəçilik Akademiyasının rektoru, akademik Urxan Ələkbərov bildirib ki, konfrans Prezident Administrasiyasının rəhbəri, akademik Ramiz Mehdiyevin sərəncamı ilə təsdiq edilmiş "Dövlət qulluqçularının peşə bayramı gününün qeyd edilməsi ilə bağlı tədbirlər planı"na əsasən təşkil olunub. Rektor qeyd edib ki, konfransın işində Prezident Administrasiyası, Nazirlər Kabineti, Milli Məclis, Konstitusiya Məhkəməsi, Heydər Əliyev Mərkəzi, Ombudsman Aparatı, Mərkəzi Seçki Komissiyası, Baş Prokurorluq və digər dövlət qurumlarının təmsilçiləri iştirak edir.
Sonra DİM Direktorlar Şurasının sədri Məleykə Abbaszadə "Dövlət idarəetmə sisteminin təkmilləşdirilməsi dövründə dövlət qulluğunun inkişafı" adlı məruzə ilə çıxış edib. M. Abbaszadə deyib ki, rəsmi statistikaya əsasən ölkədə dövlət qulluqçularının sayı 30 133 nəfərdir: "Ötən müddət ərzində 6000-dən çox şəxs dövlət qulluğuna qəbul olunub. Müsabiqə əsasında vəzifəyə qəbul olunanların isə 80 faizi gənclərdir".
Sonda Dövlət İdarəçilik Akademiyasında məzun olan dövlət qulluqçularına magistr diplomları təqdim olunub.