Lavrovdan İrəvana sərt xəbərdarlıq Siyasət

Lavrovdan İrəvana sərt xəbərdarlıq

"Münasibətlər korlana bilər"

Rusiya ilə onun Kollektiv Təhlükəsizlik Müqaviləsi Təşkilatındakı (KTMT) müttəfiqləri, xüsusən də İrəvan arasında gərginliyə səbəb olan ciddi mübahisəli vəziyyət yaranıb.
"Kommersant" bildirir ki, Moskva KTMT-yə üzv dövlətin ərazisində, o cümlədən Ermənistanda ABŞ laboratoriyalarının yerləşdirilməsindən hədsiz narazıdır.
"Kommersant"ın yazıdığına görə, Rusiya XİN-in rəhbəri Sergey Lavrov Alma-Atada keçirilən KTMT xarici işlər nazirləri toplantısında bu məsələni qaldırıb. Lavrov Ermənistan və Qazaxıstan ərazisindəki ABŞ-ın maliyyə dəstəyilə açılan və fəaliyyət göstərən laboratoriyaların Rusiyanı narahat etdiyini bildirib.
Belə laboratoriyalar Ukrayna və Gürcüstanda da var. Qeyd olunur ki, Rusiyanın xüsusi xidmət orqanları və alimləri Amerikanın nəzarətində olan bu cür laboratoriyaların postsovet məkanında yaradılması və yayılmasından narahatdırlar. Çünki həmin laboratoriyalar sonda hansısa yolla Rusiyaya qarşı istifadə oluna bilər.
Laboratoriyaların Qərbi Avropa ölkələrində yox, nədənsə Rusiyanın yaxın ətrafında – inqilab və dövlət çevirişlərinin baş verdiyi və onun əsas müttəfiqləri olan postsovet dövlətlərində yerləşdirilməsi suallar doğurur.
"Kommersant" yazır ki, Moskva həmin laboratoriyalara giriş əldə etmək istəyir. Hətta bioloji tədqiqatlar sahəsində əməkdaşlıqla bağlı İrəvanla ayrıca sənədin imzalanması da müzakirə olunur. Moskva hesab edir ki, bu, rus mütəxəssislərinə Ermənistandakı ABŞlaboratoriyalarına girişi təmin edəcək. Çünki ABŞ laboratoriyaları heç də bəyan etdikləri məqsəd və vəzifələrə - Ermənistanda epidemioloji təhlükəsizliyin yüksəldilməsinə xidmət etmir.
Moskvanın İrəvanla bağlı narahatlığı anlaşılandır. Bundan öncə "Kommersant" yazmışdı ki, Ermənistan baş naziri Nikol Paşinyan ən vacib postlardan biri – müdafiə naziri vəzifəsinə 2004-2007-ci illərdə Ermənistan silahlı qüvvələrinin NATO-dakı nümayəndəsi, konkret olaraq, NATO və ABŞ kəşfiyyatına işləmiş David Tonoyanı təyin edib. Sübut olunub ki, Tonoyan Ermənistanda Amerikaya məxsus biolaboratoriyalar şəbəkəsinin yaradılması üzrə layihənin koordinatorudur. Və artıq Gürcüstan və Ukraynada "uğurlu" fəaliyyət göstərən belə laboratoriyalar epidemioloji tədqiqatlar yox, bioloji silah yaradılması üzərində işləyir. Rusiya üçünsə bu, müttəfiqinin potensial təhdid mənbəyi olması deməkdir.