"Türkiyə Cümhuriyyətinin 95 yaşı tamam olur. Atatürkün Osmanlı imperatorluğunun xarabalıqları üzərində qurduğu çağdaş, demokratik cümhuriyyət, bayramın mübarək! Türk dünyasında ilk cümhuriyyəti bizim babalarımız qursa da, onu ən uzun, ən şərəflə yaşadan sən oldun!".
Bunu Azərbaycanın Macarıstandakı səfiri Vilayət Quliyev Türkiyə Cümhuriyyətinin 95 illiyi barədə fikirlərini bölüşərkən deyib.
Azərbaycanlı diplomat bəzi maraqlı məqamları da qeyd edib.
"Bir zamanlar dünyanın üç qitəsində hökmranlıq etmiş türklərin gələcək dövlətinin sərhədlərinin yalnız Ankara və çevrəsi ilə məhdudlaşdırıldığı günlərdə Britaniya müstəmləkə ordusunun mayoru Beyond əsir kimi Malta adasında saxlanan Əhməd Ağaoğluna demişdi: "Mənim qənaətimə görə türklər tarixdə hələ son sözlərini söyləməyiblər. Bu millət bir daha cahangir olmağa namizəddir".
Əhməd bəy yazır:
"Mən bu sözləri bir lağ, bir istehza kimi qəbul etdim. Çünki o zaman hələ nə Ankara vardı, nə də milli hərəkat! Hər tərəf çökmüş, dağılmış, düşmənlər haqqımızda ölüm qərarı vermişdilər. Fəqət söz sahibi mayor Beyond, ingilis ordusunun ün qazanmış və bütün orduda sayğı göstərilən bir zabiti idi. Ertəsi gün düşərgəyə gələrkən ondan:
- Dünən bir şeylər söylədiniz. Fikrinizi necə əsaslandırırsınız?- deyə soruşdum.
- Mən üç ildən bəridir ki, bu əsir düşərgəsinin komandanıyam. Əlimin altından bir çox türklər gəlib, keçib. Onları yaxından tanıdım, müşahidə etdim. Anladım ki, bu millət hər kəsin düşündüyünün əksinə olaraq qətiyyən çökməyib və içində çox dərin həyat qaynaqları daşımaqdadır -dedi".
İnanmaq istərdim ki, Şuşanı və işğal edilmiş bütün torpaqlarımızı azad edənə qədər o sönməyən həyat qaynaqları bizim də içimizdə çağlayacaq!".