Aİ-nin qonşuluq və genişlənmə üzrə komissarı Yohannes Hanın Azərbaycana səfəri zamanı "Şərq Tərəfdaşlığı" proqramı çərçivəsində əməkdaşlığın genişləndirilməsi imkanları müzakirə ediləcək. Bu barədə cümə axşamı Trend-ə Yohannes Han özü məlumat verib. Komissar bildirib: "Mən apreldə Riqada "Şərq Tərəfdaşlığı" proqramının iştirakçısı olan ölkələrin növbəti zirvə toplantısına qədər Azərbaycana səfər etmək niyyətindəyəm".
Yohannes Han deyib ki, Azərbaycan və Avropa İttifaqı ümumi maraqları paylaşırlar: "Bu müstəvidə nümunələrdən biri enerji təklükəsizliyidir, "Şərq Tərəfdaşlığı" proqramı çərçivəsində əməkdaşlıq ikitərəfli münasibətlərimizdə mühüm vasitədir". Onun sözlərinə görə, Aİ qonşuluq siyasəti çərçivəsində Azərbaycana 2014-2017-cü illərdə 94 milyon avrodan artıq konkret yardım təklif edir: "Həmin vəsaitlər regional tərəfdaşlıq nəzərə alınmadan "Şərq Tərəfdaşlığı" proqramı çərçivəsində ayrılır. Hədəfimiz Azərbaycanla ölkənin modernləşdirilməsi, regional inkişaf, təhsil, eləcə də hüququ sahədə islahatlar məsələsində səylərin birləşdirilməsidir". Yohannes Han qeyd edib ki, "Şərq Tərəfdaşlığı" proqramının iştirakçısı olan ölkələrin qarşıdakı zirvə toplantısı proqramın tərəfdaşları arasında birgə koordinasiya üçün yaxşı fürsət olacaq. "Şərq Tərəfdaşlığı" proqramının iştirakçısı olan ölkələrin növbəti zirvə toplantısı mayın 21-22-də Riqada keçiriləcək.