“Prezident İlham Əliyevin Naxçıvana hər səfəri özündə böyük məna daşıyıb və mühüm nəticələrlə yadda qalıb. Prezident İlham Əliyevin son günlərdə Naxçıvana səfəri zamanı Azərbaycan Televiziyasına verdiyi müsahibədə Naxçıvanın bundan sonra da sürətli sosial-iqtisadi inkişafının təmin ediləcəyini diqqətə çatdırıb. Prezident İlham Əliyev Naxçıvanın müdafiə potensialının gücləndirilməsini prioritet məsələ kimi qiymətləndirir”.

Bu sözləri xalqcebhesi.az-a açıqlamasında Milli Məclisin deputatı Müşfiq Cəfərov deyib.

M.Cəfərovun sözlərinə görə, son illərdə həm texnika ilə təchizat, həm də yeni komando qüvvələrinin yaradılması baxımdan Naxçıvanın hərbi gücü özünü göstərdi: “Bu gün Azərbaycan Silahlı Qüvvələri bölgədə söz sahibidir. O cümlədən Naxçıvanda hərbi potensial gündən-günə gücləndirilir və gücləndiriləcək. Dövlət başçısının Naxçıvana növbəti səfəri də muxtar respublikanın inkişafı, həyata keçirilən layihələrin vəziyyəti və qarşıda duran vəzifələrin müəyyənləşdirilməsi baxımından xüsusi əhəmiyyət daşıyır. Prezident İlham Əliyevin Naxçıvana səfərləri yalnız müxtəlif obyektlərin açılışı və layihələrin təqdimatı ilə məhdudlaşmır. Bu səfərlər həm də Naxçıvanın gələcək inkişaf istiqamətlərinin müəyyənləşdirilməsi, sosial problemlərin həlli və əhalinin rifahının yüksəldilməsi baxımından böyük əhəmiyyət daşıyır”.

Deputat diqqətə çatdırıb ki, dövlət başçısının Naxçıvana səfərləri zamanı həm də yeni layihələrin təməli qoyulub, infrastrukturun inkişafı ilə bağlı mühüm qərarlar qəbul edilib: “Muxtar respublikada yolların, enerji sisteminin, təhsil və səhiyyə müəssisələrinin, yaşayış məntəqələrinin və digər infrastruktur obyektlərinin yenilənməsi istiqamətində genişmiqyaslı işlər görülür. Bu tədbirlər Naxçıvanın müasir və dayanıqlı inkişafına mühüm töhfə verir. Ümumiyyətlə, Prezident İlham Əliyevin siyasətində regionların sosial-iqtisadi inkişafı xüsusi yer tutur. Bu siyasətin əsas məqsədlərindən biri paytaxtla yanaşı, Azərbaycanın bütün bölgələrinin hərtərəfli inkişafını təmin etməkdir. Naxçıvan da bu strategiyanın mühüm istiqamətlərindən biridir. Son illərdə muxtar respublikada həyata keçirilən layihələr insanların gündəlik həyat şəraitinin yaxşılaşdırılmasına, yeni iş yerlərinin yaradılmasına və iqtisadi fəallığın artırılmasına xidmət edir”.

Röya İsrafilova