Ərdoğan administrasiyası: ABŞ-ın İranın nüvə obyektlərinə hücumu xaosa səbəb olacaq

ABŞ-ın İranın nüvə obyektlərinə hücumu Yaxın Şərqdə xaosa və qarışıqlığa gətirib çıxaracaq.

Xalqcebhesi.az xəbər verir ki, bu barədə Türkiyə Prezident Administrasiyasının Kommunikasiya İdarəsinin rəhbəri Fəxrəddin Altun sosial şəbəkə X-də (əvvəllər Twitter) bildirib.

“ABŞ-ın İranın nüvə obyektlərinə hava zərbəsi endirməsi və İsrailin İrana qarşı təcavüzünə qoşulması - bu, Yaxın Şərqdə sülh və sabitlik deyil, yeni bir xaos və qeyri-müəyyənlik mərhələsinin başlanğıcı olacaq”, - deyə Altun qeyd edib.

Altun əlavə edib ki, Ərdoğanın rəhbərliyi altında Türkiyə bundan sonra da bölgədə və bütün dünyada sabitliyi müdafiə edən, sivilizasiyalar arasında sülhə və Şərqlə Qərb arasında harmoniya yaradılmasına töhfə verən siyasi xəttinə sadiq qalacaq.

İyun ayının 22-nə keçən gecə ABŞ Prezidenti Donald Tramp bildirib ki, ABŞ Hərbi Hava Qüvvələri İranın üç nüvə obyektinə hücum edib. Əsas hədəf Fordo olub - uranın zənginləşdirilməsi zavodu. Zavodun sentrifuqalar zalı 100 metrlik qayalıq və dəmir-beton təbəqə ilə qorunduğuna görə hava zərbələri üçün demək olar ki, əlçatmaz hesab olunurdu.

Bu obyekti yalnız ABŞ-ın bunkerə qarşı bombaları vura bilərdi. Media məlumatlarına görə, B-2 bombardmançı təyyarələri Fordoya belə bombalar atıb. Bundan əlavə, sualtı qayıqlardan İsfahan və Natanzdakı nüvə obyektlərinə Tomahawk qanadlı raketləri ilə zərbələr endirilib.

Tramp bildirib ki, İranın uranın zənginləşdirilməsi ilə bağlı əsas obyektləri “tamamilə və tam şəkildə məhv edilib”. Bununla belə, İran tərəfi iddia edir ki, Fordo zavodu yalnız qismən zədələnib.

Məryəm Quliyeva