İranın xarici işlər naziri Abbas Erakçi Avropa ölkələrinə çağırış edərək, İsrailin təcavüzkar siyasətlərinə qarşı məsuliyyətli və ədalətli mövqe tutmalarını tələb edib.

Xalqcebhesi.az İranın rəsmi xəbər agentliyi IRNA-a istinadən xəbər verir ki, Erakçi Polşanın xarici işlər naziri Radoslaw Sikorski ilə telefon danışığı aparıb.

Erakçi, İsrail və ABŞ-ın İrana qarşı həyata keçirdiyi hücumların Avropa ölkələri tərəfindən açıq şəkildə qınanmamasını tənqid edərək belə deyib:
"Avropa ölkələri, İsrailin bölgədə davam edən təcavüzkar hərəkətlərinə qarşı məsuliyyətli və ədalətli mövqe nümayiş etdirməlidir."

O, İsrail və ABŞ-ın İranın nüvə obyektlərinə qarşı hücumlarının, Nüvə Silahlarının Yayılmasının Qarşısının Alınması Müqaviləsi (NPT), BMT Təhlükəsizlik Şurası və Atom Enerjisi üzrə Beynəlxalq Agentliyin (AEBA) qərarlarının açıq şəkildə pozulması olduğunu bildirib.

Erakçi əlavə edib ki, bu qanunsuz və cinayət xarakterli hərəkətlərə görə yalnız ABŞ və İsrail deyil, həmçinin bu addımları dəstəkləyən digər ölkələr də məsuliyyət daşıyacaq.

Məryəm Quliyeva