“ABŞ Prezidenti Donald Tramp danışıqların getməsi ilə bağlı müəyyən bəyanatlar verir. Amma İran tərəfdən təkzibedici mövqeləri görürük, bəyanatlar eşidirik. Hazırkı vəziyyətdə bir sıra ölkələr vasitəçilik etmək istəyir. Pakistanda da bir tədbir keçirildi. Pakistan, Çin, Misir və Türkiyə arasında görüş keçirildi”.

Bu sözləri xalqcebhesi.az-a açıqlamasında Milli Məclisin deputatı Elşad Musayev söyləyib.

Deputat qeyd edib ki, Pakistanın, o cümlədən Çinin vasitəçilik missiyaları barədə də müəyyən xəbərlər gəzir: “Mümkün deyil ki, arxa planda bu məsələlər müzakirə olunmasın. Amma İran tərəfi bunu qəti təkzib edir. Burada da müəyyən variantlar verilir ki, əgər razılaşma mümkündürsə, necə ola bilər? Analitiklərin verdiyi məlumat ondan ibarətdir ki, indiki halda hələlik sülh müqaviləsinin olmasını gözləmək tezdir. Ola bilsin atəşkəslə bağlı müəyyən razılıq əldə olunsun. Bu da ehtimallardan biridir. Problem həll olunmayıb. Ona görə də istər atəşkəsin olması, istər ümumi razılığın olması hələlik həlli mümkün variant kimi görünmür. Çünki İran tərəfi açıq-aşkar nüvə proqramını davam etdirəcəyini bildirib. ABŞ-nin isə əsas tələblərindən biri odur ki, İran nüvə proqramından imtina etsin. Ballistik raketlərin istehsalı ilə bağlı İran öz mövqeyində qalır. Bununla bağlı ABŞ-nin fərqli, İranın fərqli mövqeyi var”.

E.Musayevin sözlərinə görə, eyni zamanda, Hörmüz boğazı faktiki bağlıdır, bununla bağlı da ABŞ və İranın mövqeyi fərqlidir: “Həmçinin İran ABŞ-dən sanksiyaları dayandırmağı tələb edir. Bu məsələlərdə tərəflərin mövqeyi bir-birindən çox uzaqdır. Hesab edirəm ki, hələlik iri güclərin, xüsusən Çinin məsələyə qarışması ilə müəyyən qədər fərqli yöndən məsələlərə yanaşma olar. ABŞ-də qarşıda seçkilər gözlənilir. Nümayəndələr Palatası seçilməlidir və Senatın üçdə biri seçilməlidir. Ona görə də ABŞ Prezidentinə bu məsələni çox uzatmaq sərf etmir. Amma onu da nəzər alaq ki, ABŞ-nin qarşısına qoyduğu bir məqsəd var, ona çatmaq istəyir. Eləcə də ABŞ super güc kimi istəyini reallaşdırmaq, bu bölgədə neftə nəzarət etmək, ümumiyyətlə, dünya neftinin 50-55 faizinə nəzarət etmək istəyir, eyni zamanda, İranı zəifləmiş, özündən asılı vəziyyətə salmış görmək istəyir. Ona görə də hələlik bu qısa müddətdə sülh müqaviləsinin imzalanacağına ümidlər azalır, indiki halda isə ümumiyyətlə görünmür”.

Röya İsrafilova