Tural

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) tərəfindən dövlət nəzarəti tədbirlərinin gücləndirilməsi, habelə işəgötürənlər arasında müvafiq təbliğat-məlumatlandırma işlərinin aparılması iş yerlərində əmək qanunvericiliyinin pozulması hallarının azalmasına səbəb olur. Cari ilin yanvar ayında DƏMX həyata keçirilən dövlət nəzarəti zamanı ayrı-ayrı müəssisələrdə əmək qanunvericiliyinin pozulması ilə bağlı ümumilikdə 492 fakt aşkar olunub ki, bu da ötən ilin müvafiq dövrü ilə müqayisədə 19,3 faiz azdır. Belə hallara əsasən özəl sektora aid müəssisələrdə, ticarət və ictimai iaşə, topdansatış, tikinti sektorlarında yol verilib.
Aşkar edilmiş hüquq pozuntularına görə İnzibati Xətalar Məcəlləsinin müvafiq bəndlərinə əsasən, aidiyyatı işəgötürənlərə tətbiq olunmuş cərimələrin 50,6 faizi (85796 manat) dövlət büdcəsinə ödənilib ki, həmin məbləğ 2014-cü ilin yanvar ayına dair müvafiq göstərici ilə müqayisədə 44,9 faiz çoxdur.