Azərbaycan-İsveçrə Birgə Komissiyasının iclası keçirilib

Tural

İsveçrə Konfederasiyasının İqtisadi Məsələlər üzrə Dövlət Katibliyinin Ticarət Sazişləri üzrə Federal Şurasının (SECO) nümayəndəsi Liviya Leunun rəhbərlik etdiyi nümayəndə heyəti ölkəmizə səfər gəliblər. Bakı Biznes Mərkəzində Azərbaycan Respublikası Hökuməti və İsveçrə Konfederasiyası Federal Şurası arasında Ticarət və İqtisadi Əməkdaşlıq üzrə Birgə Komissiyanın 7-ci iclası keçirilmişdir. Birgə Komissiyanın həmsədrləri - Azərbaycanın iqtisadiyyat naziri Şahin Mustafayev və İsveçrə Konfederasiyasının İqtisadi Məsələlər üzrə Dövlət Katibliyinin Ticarət Sazişləri üzrə Federal Şurasının nümayəndəsi xanım Liviya Leunun rəhbərlik etdikləri iclasda hər iki ölkənin komissiyada təmsil olunan müvafiq qurumlarının rəsmiləri və tanınmış şirkətlərin nümayəndələri iştirak etmişlər.
İclasda çıxış edən Birgə Komissiyanın həmsədri, iqtisadiyyat naziri Şahin Mustafayev Azərbaycan və İsveçrə arasında əlaqələrin inkişaf etdiyini, qarşılıqlı səfərlərin və keçirilən görüşlərin xüsusi rolunu vurğulamışdır. Bildirilmişdir ki, İsveçrə tərəfindən Azərbaycan iqtisadiyyatına 220 mln. dollar investisiya yatırılmışdır. Azərbaycan da İsveçrəyə sərmayə qoymuşdur. Hazırda İsveçrədə SOCAR brendi ilə 148 yanacaqdoldurma stansiyası fəaliyyət göstərir.
Azərbaycanda 65 İsveçrə şirkətinin fəaliyyət göstərdiyini qeyd edən Şahin Mustafayev İsveçrənin "Holcim" şirkətinin Azərbaycanın qeyri-neft sektorunda ən iri və uğurlu layihələrdən birini həyata keçirdiyini vurğulamışdır. Azərbaycan İsveçrənin "Stadler Rail Group" şirkəti ilə səmərəli əməkdaşlıq edir, Bakı-Sumqayıt istiqamətində bu şirkətin qatarlarından istifadə olunur. İsveçrənin "AXPO" şirkəti TAP layihəsində 5%-lik paya malikdir və "Şahdəniz" yatağının 2-ci mərhələsi üzrə qazın alıcısıdır. Bundan başqa, İsveçrənin "ABB Global Marketing FZ-LLC" və "Trub Trading International AG" şirkətləri ilə də uğurlu əməkdaşlıq həyata keçirilir.
Azərbaycan və İsveçrə arasında iqtisadi əməkdaşlığın əsas istiqamətlərindən olan ticarət dövriyyəsinin həcmi 2016-cı ilin yanvarında 2 dəfə artmışdır. İsveçrə hökuməti tərəfindən indiyədək Azərbaycanda 90 mln. dollar dəyərində 30-dan çox layihə icra olunub ki, bunun 25-i SECO tərəfindən maliyyələşdirilib. Hazırda 8 layihənin icrası davam etdirilir. Bu layihələrdən biznes mühitinin yaxşılaşdırılması ilə bağlı layihə xüsusilə qeyd edilməlidir. Turizm və mədəniyyət sahələrində də ölkələrimiz arasında əlaqələrin inkişafı istiqamətində bir sıra işlər görülür.
Gələcək əməkdaşlıq istiqamətləri barədə danışan Şahin Mustafayev sənaye, kənd təsərrüfatı, investisiya qoyuluşu, əczaçılıq, tranzit daşımaları, turizm və s. sahələrdə əlaqələrin genişləndirilməsi imkanlarını, iş adamları arasında əməkdaşlığın təşviqi üçün biznes forumların, sərgi və yarmarkaların təşkilinin davam etdirilməsinin əhəmiyyətini vurğulamışdır. Qeyd olunmuşdur ki, Sumqayıt Kimya Sənaye Parkında investorlar üçün əlverişli şərait yaradılmışdır və İsveçrə şirkətləri bu imkanlardan istifadə edə bilərlər.
İsveçrə Konfederasiyasının İqtisadi Məsələlər üzrə Dövlət Katibliyinin Ticarət Sazişləri üzrə Federal Şurasının nümayəndəsi xanım Liviya Leu çıxışında Azərbaycana səfərindən və ölkəmizdəki abadlıq-quruculuq işlərindən məmnunluğunu ifadə etmiş, qarşılıqlı səfərlərin əlaqələrin inkişafında əhəmiyyətini vurğulamışdır. Xanım Leu ölkələrimiz arasında imzalnmış sənədlərin, o cümlədən investisiyaların təşviqi və qarşılıqlı qorunmasına, ticarət və iqtisadi əməkdaşlığa, ikiqat vergitutmanın aradan qaldırılmasına dair sənədlərin iqtisadi sahədə əməkdaşlığın genişləndirilməsinə geniş imkan yaratdığını diqqətə çatdırmış, Birgə Komissiyanın iclasında aparılan müzakirələrin əlaqələrin inkişafı baxımından önəmli olduğunu bildirmişdir.
İclasda müxtəlif sahələrdə əməkdaşlığın gələcək inkişaf perspektivləri barədə müzakirələr aparılmış, iqtisadi və ticarət əlaqələrinin, investisiya əməkdaşlığının genişləndirilməsi üçün böyük potensialın olduğu qeyd edilmişdir. İclasda həmçinin, Azərbaycanda əczaçılıq məhsullarının istehsalının yaradılması müzakirə olunmuşdur. Qeyd edilmişdir ki, İsveçrənin dünyada tanınmış "Novartis Pharma Services AG" və "Roche" şirkətləri Azərbaycanda dərman istehsalı sahəsində əməkdaşlıq imkanlarını araşdırırır. Bundan başqa, İsveçrə şirkətləri ilə tibbi avadanlıq istehsalı sahəsində müzakirələr aparılır. Həmçinin bildirilmişdir ki, "Holcim Azerbaijan" sement ixracına başlamağı planlaşdırır. İsveçrənin "ABB Global Marketing FZ-LLC" şirkəti isə Azərbaycanda istehsalat sahəsinin qurulmasını araşdırır. Bundan başqa, iclasda İsveçrənin "SİKA" şirkəti Sumqayıt Kimya Sənaye Parkının rezidenti olmaq istədiyini bildirmişdir. Şirkət sənaye parkının ərazisində tikinti qarışıqları istehsal etməyi və ilkin olaraq 5,3 mln. dollar investisiya qoymağı planlaşdırır.
İclasın sonunda Azərbaycan Respublikası Hökuməti və İsveçrə Konfederasiyası Federal Şurası arasında Ticarət və İqtisadi Əməkdaşlıq üzrə Birgə Komissiyanın 7-ci iclasının yekunlarına dair Protokol imzalanmışdır. Sənədi Komissiyanın həmsədrləri - Azərbaycan Respublikasının iqtisadiyyat naziri Şahin Mustafayev və İsveçrə Konfederasiyasının İqtisadi Məsələlər üzrə Dövlət Katibliyinin Ticarət Sazişləri üzrə Federal Şurasının nümayəndəsi xanım iviya Leu imzalamışlar. Protokolda sənaye, ticarət, investisiya qoyuluşu, kənd təsərrüfatı, enerji, turizm və s. sahələrdə əməkdaşlığın daha da genişləndirilməsi nəzərdə tutulur. Sənəddə həmçinin, tərəflərin ərazi bötövlüyü və suverenliyinə, habelə beynəlxalq hüququn fundamental norma və prinsiplərinə hörmətlə yanaşdıqları, fiziki və hüquqi şəxslərin fəaliyyətində bu prinsiplərə əsaslanmaq zəruriyyəti qeyd olunur.