ƏƏSMN-də görüş Siyasət

ƏƏSMN-də görüş

Azərbaycan Respublikasının Əmək və Əhalinin Sosial Müdafiəsi Nazirliyində ölkəmizə səfərdə olan Avropa/Avrasiya Xüsusi Olimpiya Komitəsinin prezidenti Devid Yevangelista və Komitənin inkişaf üzrə direktoru Kşiştof Krukovski ilə görüş olub. Görüşdə Azərbaycan Xüsusi Olimpiya Komitəsinin prezidenti Şahin Əliyev və vitse-prezidenti Rövşən Məmmədov, Azərbaycan Xüsusi Olimpiya İcraiyyə Komitəsinin üzvləri, millət vəkilləri Fazil Mustafa və Müslüm Məmmədov da iştirak ediblər.
Əmək və əhalinin sosial müdafiəsi naziri Səlim Müslümov ölkəmizdə əlilliyi olan şəxslərin sosial təminatının gücləndirilməsi ilə bərabər, onların reabilitasiyası və cəmiyyətə inteqrasiyasının da Azərbaycan Prezidenti cənab İlham Əliyevin uğurlu sosial siyasətində mühüm yer tutduğunu vurğulayıb: "Hazırda Azərbaycan əhalisinin 6 faizini əlilliyi olan şəxslər təşkil edir. Ölkədə sağlamlıq imkanları məhdud uşaqların sayı isə 71600 nəfərdir. Həmin insanların hüquqlarının təminatı, onların reabilitasiya xidmətləri ilə təmin olunması, əmək bazarına, habelə səhiyyə və təhsil xidmətlərinə çıxış imkanlarının artırılması istiqamətində ölkəmiz fəal və məqsədyönlü siyasətə malikdir".
Qeyd olunan istiqamətlərdə həyata keçirilən tədbirlər barədə məlumat verən Səlim Müslümov əlilliyi olan şəxslərin bədən tərbiyəsi və idman vasitəsilə reabilitasiyası və cəmiyyətə inteqrasiyasının da diqqətdə saxlandığını bildirib: "Bu tədbirlər eyni zamanda sağlamlıq imkanları məhdud uşaqları da əhatə edir. Hazırda Əmək və Əhalinin Sosial Müdafiəsi Nazirliyinin bu təbəqədən olan və əqli imkanları məhdud uşaqlar üçün 2 sosial xidmət müəssisəsi fəaliyyət göstərir. Hər iki müəssisədə 330 nəfərdən çox uşaq hərtərəfli dövlət himayəsində yaşayır. Son illərdə Heydər Əliyev Fondunun dəstəyi ilə həmin müəssisələrdə həm uşaqların yaşayışı və təminatı, həm də müxtəlif formalarda reabilitasiya tədbirlərinə cəlb olunmaları üçün ən müasir standartlara uyğun şərait yaradılıb".
Nazir qeyd edib ki, eyni zamanda, bu uşaqlara müəyyən edilmiş müvafiq proqram üzrə potensiallarına uyğun xüsusi atletik idman növləri ilə məşğul olmaları, xüsusi atletika üzrə yarışlarda iştirak etmələri üçün lazımi tədbirlər görülür: "Ötən müddətdə həmin uşaqlardan bir qisminin beynəlxalq səviyyəli yarışlarda iştirakı da təmin olunub. Misal üçün, nazirliyin 2 saylı sosial xidmət müəssisəsində yaşayan Həbib Tağıyev 2014-cü ildə Belçikada keçirilən "Avropa Xüsusi Yay Olimpiya Oyunları 2014" yarışlarında, 2015-ci ildə ABŞ-da təşkil edilən Ümumdünya Xüsusi Yay Olimpiya Oyunlarında uğurla çıxış edərək medallara sahib olub".
Səlim Müslümov bu sahədə fəaliyyətdə Azərbaycan Xüsusi Olimpiya Komitəsi ilə fəal əməkdaşlığın həyata keçirildiyini diqqətə çatdırıb: "Təcrübə göstərir ki, əlilliyi olan şəxslərin, o cümlədən sağlamlıq imkanları məhdud uşaqların potensialları müqabilində bədən tərbiyəsi və idman növlərinə cəlb edilmələri onların reabilitasiyasında, cəmiyyətə uğurla adaptasiyasında əhəmiyyətli təsirə malikdir. Ona görə də nazirlik Azərbaycan Xüsusi Olimpiya Komitəsi ilə qarşılıqlı əməkdaşlıq şəraitində işləyir, Komitə tərəfindən bu sahədə irəli sürülən təşəbbüsləri, layihələri dəstəkləyir".
Devid Yevangelista ölkəmizdə xüsusi olimpiya hərəkatının genişlənməsinə Azərbaycan Prezidenti cənab İlham Əliyev tərəfindən xüsusi diqqət və qayğı göstərilməsini yüksək dəyərləndirib. O, bu sahədə aparılan işlərdə, o cümlədən sağlamlıq imkanları məhdud uşaqların reabilitasiyasında Azərbaycanın birinci xanımı, Heydər Əliyev Fondunun prezidenti, millət vəkili Mehriban xanım Əliyevanın xidmətlərini xüsusi vurğulayıb. Devid Yevangelista bir cox ölkələrdə əqli imkanları məhdud əlilliyi olan şəxslərin daha çox qapalı şəraitdə, sanki pərdə arxasında saxlanıldığını qeyd edərək bildirib ki, Azərbaycanda bu sahədə mütərəqqi yanaşma, həmin insanlara çox açıq münasibət var və onlar üçün ictimai həyatda fəal iştirak imkanları yaradılıb. Ona görə də Avropa/Avrasiya Xüsusi Olimpiya Komitəsi müvafiq sahədə Azərbaycan hökuməti ilə əməkdaşlıqdan, birgə işləməkdən məmnundur. O, respublikada aidiyyəti qurumların, o cümlədən Əmək və Əhalinin Sosial Müdafiəsi Nazirliyinin Azərbaycan Xüsusi Olimpiya Komitəsi ilə qarşılıqlı və səmərəli fəaliyyətinin, Komitəyə daim dəstək verməsinin təqdirəlayiq olduğunu diqqətə çatdırıb.
Görüşdə əqli imkanları məhdud əlilliyi olan şəxslərin idman vasitəsilə reabilitasiyası sahəsində görülən işlər və onların nəticələri nəzərdən keçirilib, bu sahədə Avropa/Avrasiya Xüsusi Olimpiya Komitəsi ilə gələcək əməkdaşlıq istiqamətləri müzakirə olunub.