"Rusiya necə istəsə, Ermənistanda seçkilərin nəticələri də o cür formalaşdırılacaq. Seçki prosesində istifadə edilən müxtəlif karusellər işə salına, hətta Moskva İrəvanda istəyinə nail olmaq üçün dəstəklədiyi siyasi qrupların xeyrinə seçkiləri saxtalaşdırmağa kimi gedə bilər".
Bu sözləri sabiq dövlət müşaviri Qabil Hüseynli deyib. Politoloq vurğulayıb ki, Moskva İrəvandakı siyasi proseslərə çox ciddi nəzarət edir və ölkədə lobbiçilik siyasəti həyata keçirir:
"Rusiya öz forpostunu sözün həqiqi mənasında quberniya kimi idarə etmək üçün istədiyi erməni siyasilərə "qayğı" göstərir. Ermənistanda siyasi sistem dəyişəcəyi üçün builki seçkilərə diqqət çox böyükdür. Düzdür, idarəçilik sisteminin dəyişməsi bir növ Sərkisyanın maraqlarına xidmət edir və o, baş nazir səlahiyyətinə yiyələnmək niyyəti güdür. Çünki parlamentlə yanaşı, Nazirlər Kabinetinin səlahiyyətləri də artırılır. Yəni icra hakimiyyətinin əsas funksiyaları Nazirlər Kabinetinin əlində formalaşır və əgər Sərkisyan bu posta yiyələnərsə, prezidentdən daha çox səlahiyyətlərə malik olacaq. Burada əsas rolu isə Rusiya oynayacaq. Yəni Rusiya necə istəsə, Ermənistanda seçkilərin nəticələri də o cür formalaşdırılacaq. Seçki prosesində istifadə edilən müxtəlif karusellər işə salına, hətta Moskva İrəvanda istəyinə nail olmaq üçün dəstəklədiyi siyasi qrupların xeyrinə seçkiləri saxtalaşdırmağa kimi gedə bilər. Kreml indidən Ermənistanda müəyyən siyasi qrupların əlini gücləndirir. Son zamanlar Rusiyada Sərkisyana dəstək artır, Moskva İrəvanın Qarabağla bağlı mövqeyini müdafiə edir, bu, təsadüfi deyil".
Politoloq Rusiyanın başlatdığı bu prosesin o qədər də asan keçməyəcəyini deyib:
"Bu gün Ermənistanda siyasi müxalifətin ciddi inteqrasiyası gedir. Məncə, müxaliflər Ermənistanda bütün protest elektoratını ətraflarında toplamağa qadirdir. Az qala əhalinin 70-80 faizi Sərkisyana qarşıdır. Bu da seçkilərdə tam qələbə qazanmaq üçün kifayətdir. Ancaq Rusiya düz 10 il əvvəlki kimi proseslərə müdaxilə edəcək. Ermənistanda ciddi qarşıdurmalar olacaq. Sərkisyan 10 il bundan əvvəl hakimiyyətə gələrkən martın 1-də ciddi xalq etirazları oldu. Rusiyadan gəlmiş "Alfa" qrupunun köməyi olmasaydı, ayağa qalxmış kütlələr ölkədə siyasi vəziyyəti tamamilə dəyişəcəkdi. Bu dəfə də 10 il əvvəlki hadisələrin təkrarlanması, seçkilərin qanlı qarşıdurma ilə nəticələnməsi tamamilə real görünür".
Qeyd edək ki, bu il aprelin 2-də Ermənistanda növbəti parlament seçkisi keçiriləcək, ölkə parlament idarə üsuluna keçəcək.