"Avropa İnsan Haqları Məhkəməsinin Böyük Palatasının "Çıraqovlar və digərlərinin Ermənistana qarşı" işi üzrə qərarı məndə ikili hiss yaratdı". Bunu millət vəkili, politoloq Sahib Alıyev öz facebook səhifəsində qeyd edib. O bildirib ki, can verə-verə, süründürə-süründürə olsa da, bu qərarla Ermənistanın işğalçılığını və vəhşiliyini təsdiqlədilər: "Şikayət ərizəsi verən 6 azərbaycanlının evlərini dağıdılmasında, mülklərinin yağmalanmasında, onların yurd yerlərindən didərgin salınmasında haylar suçlu bilinir. Axır ki. Ancaq baxın, bütün bu vəhşiliklərin qarşılığında içğalçıdan tələb olunan təzminatın həcmi nə qədərdir-5 min avro. Təsəvvür edirsinizmi, Ermənistan evini dağıtdığı, mülkünü yağmaladığı, yurdundan didərgin saldığı, min bir zillətlə üzləşdirdiyi həmən 6 azərbaycanlının hər birinə cəmi 5 min avro ödəməlidir?! Cəmi 5 min avro... Görəsən, bizim "siyasi dustaq" adlandırılanların şikayətinə gələndə, nədən həmən bu Avropa İnsan Haqları Məhkəməsi görünməmiş operativlik sərgiləyir və kəsdiyi cərimələr də, Ermənistandan tələb ediləndən dəfələrlə artıq olur".