"Fərqli dinə mənsub olan insanlar Azərbaycanda qarşılıqlı anlaşma və sülh şəraitində yaşayır".
Bunu Azərbaycanın xarici işlər naziri Elmar Məmmədyarov BMT-nin İnsan Hüquqları Şurasının (İHŞ) 37-ci sessiyasının yüksək səviyyəli seqmentində çıxışı zamanı deyib.
Nazir vurğulayıb ki, demokratiyanın gücləndirilməsi, insan hüquqlarının qorunması və təhsil Azərbaycan siyasətinin əsas prioritetlərindəndir, yaxşı təhsil uğurlu inkişafın təməlidir: "Bundan başqa, hər il 5 milyondan çox insan icbari tibbi müayinədən keçirilir. Azərbaycan ilk müsəlman ölkəsidir ki, qadınlara seçki hüququ verib. Ölkə gender bərabərliyini qorumağa və qadınların cəmiyyətdə rolunu gücləndirməyə çalışır".
Azərbaycanda bir sıra beynəlxalq tədbirlərin həyata keçirildiyini xatırladan nazir deyib ki, Azərbaycan müsəlman və Avropa ölkələri ilə əməkdaşlığı daha inkişaf etdirmək istəyir.
Azərbaycan torpaqlarının 20%-nin uzun müddətdir, erməni işğalı altında olduğunu xüsusi vurğulayan E. Məmmədyarov bildirib ki, ermənilərin etnik təmizləmə siyasəti nəticəsində hazırda bir milyon insan ölkəsində qaçqın, məcburi köçkün kimi yaşayır: "Ermənistanın bu siyasəti Azərbaycanın suverenliyini və ərazi bütövlüyün dəstəkləyən beynəlxalq sənədlərin pozulmasıdır. Dünən Xocalı faciəsinin 26-cı ildönümünü qeyd etdik. Bu faciəni törədənlər hələ də ədalət qarşısında cavab verməyiblər. Ermənistan Azərbaycan xalqının insan hüquqlarını pozmağa davam edir".