Türkiyənin Düzce şəhərində baş vermiş torpaq sürüşməsi və sel nəticəsində Akçakoca rayonunda itkin düşənlərdən beş nəfərin cəsədi artıq tapılıb.
AZƏRTAC xəbər verir ki, digər iki nəfərin axtarış-xilasetmə işləri davam etdirilir.
Quruda və suda aparılan axtarış-xilasetmə işlərinə 234 nəfərlik briqada cəlb olunub.
Bundan əlavə, 22 kəndin seldən zərər gördüyü bildirilir. Minlərlə hektar əkin sahəsi yararsız hala düşüb, 170 minə yaxın ev heyvanı tələf olub.
Hadisə nəticəsində 75-i ağır olmaqla 375 binaya zərər dəyib. Yüz ev isə tamamilə dağılıb.
Qeyd edək ki, iyulun 17-də və 18-də yağan güclü yağış səbəbindən Melen çayının daşması nəticəsində şəhərin Cumayeri, Gölyaka və Akçakoca rayonlarında sel və torpaq sürüşməsi baş verib. Təbii fəlakət nəticəsində 7 nəfər itkin düşüb, 227 nəfər xilas edilib.