Şimali Makedoniyada koronavirusun "Britaniya ştammı" aşkarlanıb Dünya

Şimali Makedoniyada koronavirusun "Britaniya ştammı" aşkarlanıb

Şimali Makedoniyada koronavirus infeksiyasının "Britaniya ştammı"na ilk yoluxma hadisəsi qeydə alınıb.

Trend-in TASS-a istinadən verdiyi məlumata görə, bunu balkan respublikasının səhiyyə naziri Venko Filipçe jurnalistlərə açıqlamasında deyib.

Virus ölkədən xaricə getməmiş 46 yaşlı vətəndaşda aşkar edilib. Şimali Makedoniyanın Səhiyyə Nazirliyi infeksiya aşkar edilən vətəndaşın ötən ilin dekabr ayının sonunda koronavirusla xəstələndiyi nəzərə alaraq, ölkənin digər sakinlərində sözügedən virusun olduğunu ehtimal edir.

Son məlumata əsasən Şimali Makedoniyada 91 555 koronavirusa yoluxma hadisəsi baş verib, 80 008 nəfər xəstəlikdən sağalıb, 2 821 virusa yoluxan ölüb.