Beynəlxalq Miqrasiya Təşkilatı (BMqT) tərəfindən Naxçıvanda qanunsuz miqrasiya ilə mübarizəyə dair təcrübələrin bölüşməsi üzrə texniki seminar keçirilib.
Təşkilatdan verilən məlumata görə, seminar "Azərbaycanda Miqrasiya və Sərhəd idarəçiliyi üzrə potensialların gücləndirilməsi" layihəsi çərçivəsində Azərbaycan hökuməti ilə əməkdaşlıq çərçivəsində və Avropa İttifaqının Azərbaycandakı nümayəndəliyinin dəstəyi ilə baş tutub.
Seminarda Naxçıvan Muxtar Respublikasının Dövlət Miqrasiya Xidmətinin sədri Şahin Nəbiyev, Aİ-nin Azərbaycandakı nümayəndəliyinin rəhbəri səfir Kestutis Yankauskas, BMqT-nin Azərbaycandakı nümayəndəliyinin rəhbəri Serhan Aktoprak iştirak ediblər.
Ş. Nəbiyev çıxışında BMqT və Aİ ilə əməkdaşlıq çərçivəsində miqrasiyaya dair xeyli iş görüldüyünü və məhsuldar nəticələr əldə olunduğunu bildirib.
Aİ-nin Azərbaycandakı nümayəndəliyinin rəhbəri Kestutis Yankauskas deyib ki, beynəlxalq ekspertlərin, həmçinin müxtəlif ölkələrin miqrasiya sahəsinə aid strukturların nümayəndələrinin iştirakı ilə keçirilən iki günlük seminarda təcrübə mübadiləsi çox faydalı olub. Səfir bildirib ki, Aİ üçün insan alverinə qarşı mübarizə prioritet sahə olaraq qalır və bu cinayətlərin aradan qaldırmaq üçün birgə əməkdaşlığa bundan sonra da hazırdır.
BMqT-nin Azərbaycan nümayəndəliyinin rəhbəri Serhan Aktoprak isə çıxışında qeyd edib ki, 2018-ci ildə qəbul olunması planlaşdırılan Miqrasiya üzrə Qlobal Kompakt təşəbbüsünə qoşulmaq üçün Azərbaycan da yaxşı imkanlara malikdir. Onun sözlərinə görə, Azərbaycan bununla bağlı Meksikada keçiriləcək görüşdə fəal iştirak edəcək. Nümayəndəliyin rəhbəri bildirib ki, müasir dövrdə insanların bir məntəqədən digər məntəqələrə köç edərkən baş verən faciəvi halların aradan qaldırılması üçün bütün ölkələrin birgə fəaliyyəti vacibdir.