Ali məktəblərə ixtisas seçimi başlayıb Hadisə

Ali məktəblərə ixtisas seçimi başlayıb

Bu gündən ali təhsil müəssisələrinə ixtisas seçimi başlayıb.
İxtisas seçimi avqustun 13-dək internet vasitəsi ilə aparılacaq.
Dövlət İmtahan Mərkəzin məlumatında qeyd edilib ki, ixtisas seçimi Mərkəzin rəsmi saytı vasitəsilə elektron qaydada aparılır və texniki cəhətdən bu prosesi həyata keçirmək çox sadədir. Proqram təminatı elə qurulub ki, sizin səhv etmək ehtimalınız yoxdur və ərizəni yadda saxla düyməsini basdıqda səhv və onun mahiyyəti barədə xəbərdarlıq edilir.
DİM tərəfindən abituriyentlərə kömək etmək məqsədilə I-IV ixtisas qrupları üzrə "İxtisas seçimi zamanı nələrə diqqət yetirməli" adlı vəsaitlər də nəşr edilib.
Həmçinin Dövlət İmtahan Mərkəzinin regional bölmələrində, Azərbaycan Universiteti və Qərbi Kaspi Universitetində abituriyentlərə ixtisas seçimi ilə əlaqədar kömək etmək məqsədilə yaradılmış və ödənişsiz əsaslarla fəaliyyət göstərən "Abituriyent Məsləhət Mərkəzləri"nə də müraciət etmək olar. "Məsləhət mərkəzləri"ndə xüsusi treninq keçmiş əməkdaşlar abituriyentlərə tələbə qəbulu qaydaları, "Abituriyentin elektron ixtisas seçimi ərizəsi"nin doldurulma və təsdiq edilməsi qaydası, müsabiqə şərtləri, ixtisas seçimi zamanı diqqət yetirilməli olan vacib məsələlər və s. haqqında ödənişsiz köməklik göstərirlər.
Dövlət İmtahan Mərkəzinin əməkdaşları tərəfindən Mərkəzin "İnstagram" və "Facebook" səhifələrində ixtisas seçimi zamanı diqqət yetirilməli olan məsələlər haqqında canlı yayım ediləcək, abituriyentlərin sualları cavablandırılacaq.
"Çox təəssüflər olsun ki, ali məktəbə ixtisas seçimi zamanı abituriyentlər və onların valideynləri kimlərəsə müraciət edirlər". Bunu Dövlət İmtahan Mərkəzinin Direktorlar Şurasının sədri Məleykə Abbaszadə bu gün keçirilən mətbuat konfransında deyib.
M.Abbaszadə bildirib ki, DİM öz işini tam şəffaf şəkildə aparır, sualların cavablarını ictimai ekspertizaya verir: "Lakin təəssüflər olsun ki, abituriyentlər və valideynlər DİM-in materiallarından istifadə etmir, öz uşaqlarının taleyini kiməsə həvalə edir və nəticədə abituriyent istəmədiyi ixtisasa, istəmədiyi yerə qəbul olunur. İxtisas seçimini ancaq özü etməlidir, kiməsə həvalə etməməlidir. Burada tələsmək lazım deyil. Abituriyent öz topladığı balı, seçdiyi ixtisas üzrə keçid balını müqayisə edib düzgün seçim etməlidir"