Azərbaycan ATƏT PA-nın prezidentinə müraciət edib Hadisə

Azərbaycan ATƏT PA-nın prezidentinə müraciət edib

Ermənistanın avqustun əvvəlində cəbhədə törətdiyi təxribatla bağlı

Ermənistanın avqust ayının əvvəlində Azərbaycanla təmas xəttində törətdiyi təxribatla bağlı ATƏT Parlament Assambleyasının (PA) rəhbəri İlkka Kanervaya müraciət olunub.
ATƏT PA-da Azərbaycan nümayəndə heyətinin rəhbəri, Milli Məclisin sədr müavini Bahar Muradova APA-ya açıqlamasında bildirib ki, müraciəti Azərbaycan adından o edib.
Müraciətdə assambleyadan bu təxribatla bağlı qurumun konkret münasibət bildirməsi istənilir: "Yazılı müraciətdən əlavə, bizim intensiv telefon danışıqlarımız da oldu. Qurumun prezidenti cavab məktubunda bizə bildirdi ki, bu məsələnin onlar tərəfindən ciddi diqqət mərkəzində olduğunu vurğulayıb, bununla bağlı ATƏT PA-nın Cənubi Qafqaz üzrə xüsusi nümayəndəsi Joao Suareşin münasibətini xatırladaraq fəaliyyətlərində diqqətdə saxlayacaqlarını bildirib".
B.Muradova onu da qeyd edib ki, Ermənistanın cəbhədəki təxribatı məsələsi birmənalı olaraq ATƏT PA-nın Cenevrədə keçiriləcək payız sessiyasında da qaldırılacaq.
O qeyd edib ki, sessiyanın konkret günü və gündəliyi hələ ki məlum deyil: "Amma ehtimal var ki, Bakı sessiyasında müzakirə olunan məsələlər yenidən qayıdılacaq. Çünki oradakı əksər məsələlər hələ həllini tapmayıb".
B.Muradova onu da deyib ki, sessiyada ATƏT-in Minsk Qrupunun fəaliyyəti və Qarabağ problemi ilə bağlı qurumun Bakı sessiyasında başladılan işin nəticələrinə də nail olunmağa çalışılacaq: "Bura nəinki Azərbaycan Milli Məclisinin sədri Oqtay Əsədovun ATƏT-in Minsk Qrupunun sessiyada hesabat verməsi təklifi, eyni zamanda hansısa sənədin qəbul olunmasına nail olmaq da aiddir".