Bütün çimərliklərə məsul şəxslər təhkim olunublar.

Bunu Bakı Şəhər İcra Hakimiyyəti başçısı Aparatının rəhbəri Elgin Həbibullayev Nazirlər Kabineti yanında Operativ Qərargahın brifinqində deyib.

Onun sözlərinə görə, çimərliklərdə bildiriş lövhələri quraşdırılıb və səsgücləndirici vasitələrlə məlumatlar səsləndiriləcək: “Bütün çimərliklər artıq açılışa tam hazırdır. Səsgücləndirici ilə verilən məlumatlar sosial məsafənin qorunması və virusa yolumanın qarşısını almaq üçün lazım olan informasiyaları əhatə edəcək”.

E.Həbibullayev əlavə edib ki, bəzi çimərliklərdə nişanlanma işləri də aparılıb: “Elə çimərliklər var ki, orada sosial məsafəni qorumaq üçün iplərdən istifadə olunaraq bölgülər yaradılıb”.