Ərəstun Oruclu: "Bu baş verərsə, ABŞ-da çox ciddi mübahisələr doğurar"

"Barak Obama təxminən 7 aydan sonra Ağ Evi tərk edəcək. 8 illik prezidentliyi dövründə olmuş bütün mənfi və müsbət detallarla yanaşı o, tarixdə İranla, Kuba ilə münasibətləri bərpa etmiş və ABŞ atom bombardmanına məruz qalmış Xiroşimaya səfər etmiş (bu səfər yaxın zamanlarda baş tutmalıdır) prezident kimi qalacaq".
Bu fikirləri Şərq-Qərb Araşdırmalar Mərkəzinin rəhbəri Ərəstun Oruclu səsləndirib.
O vurğulayıb ki, Obama atom bombardmanına görə ölkəsi adından üzr istəyə də bilər və bu baş verərsə, ABŞ-da çox ciddi mübahisələr doğurar:
"Baxmayaraq ki, Obamanın sadalanan bütün bu məsələlərə heç bir aidiyyatı olmayıb. 1970-ci ilin dekabrında Almaniya Federativ Respublikasının o zamankı kansleri Villi Brandt Varşava gettosunun qurbanlarının xatirəsinə ucaldılmış memorial qarşısında diz çökəndə də ölkəsində xeyli tənqidlərə məruz qalmışdı. Faşizmə qarşı barışmaz mübarizə yolu keçmiş Brandtın bu hərəkətini bir çoxları alçalmaq, kiçilmək kimi qəbul etsə də, zaman bunun Almaniyanın gələcəyi üçün çox vacib olduğunu göstərdi. Siyasətdə etirafın, üzrxahlığın böyüklük əlaməti olması mahiyyətcə kiçiklərin qidası deyil, çünki bu, cəsarət, qətiyyət və uzaqgörənlik tələb edən qərardır. Kiçiklər isə heç divan tutduqları öz xalqları qarşısında da üzr istəmək cəsarətində deyillər".