Çingiz Qənizadə: "Hər bir vətəndaş bundan bəhrələnəcək"

Sentyabrın 26-da Azərbaycanda Konstitusiyaya dəyişiklik edilməsi üçün ümumxalq səsverməsi (referendum) keçiriləcək.
Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə Konstitutsiyanın 68-ci maddəsinə edilən dəyişiklikdən danışıb: "Konstitutsiyanın 68-ci maddəsi "Zərərin ödənilməsini tələb etmək hüququ"nun adı dəyişdirilərək "Özbaşınalıqdan müdafiə və vicdanlı davranış hüququ" qoyulub. Həmin maddədə də cinayət, habelə, hakimiyyətdən sui-istifadə nəticəsində zərər çəkmiş şəxsin hüquqları qanunla qorunur. Həmçinin, əlavə olunan odur ki, hər kəsin, dövlət orqanlarının, yaxud, onların vəzifəli şəxslərinin qanunazidd hərəkətlərinin və ya hərəkətsizliyi nəticəsində vurulmuş zərərin dövlət tərəfindən ödənilməsini tələb etmək hüququ yaranır".
Deputatın fikrincə, bütün bunlar vətəndaşlara əlavə hüquqlar verir. Üstəlik, vətəndaşın istər özbaşınalıqdan, istərsə də qeyri-vicdanlı davranışdan dəymiş zərəri tələb etmək hüququ yaranır. Bu, çox gözəl hüquqdur və hesab edirəm ki, hər bir vətəndaş bundan bəhrələnəcək.
Burada söhbət insan hüquq və azadlıqlarından gedir. Həmçinin, vətəndaşın dövlət və dövlət qulluqçularının hər hansı bir qanunazidd hərəkətlərinə görə hüququ pozulubsa, dövlətin mülki məsuliyyət daşıması diqqət mərkəzində olur. Məsələn, tutaq ki, hər hansı dövlət qulluqçusunun hansısa qanunazidd hərəkəti nəticəsində vətəndaşın hüquqları pozulub. Bu zaman dövlət qulluqçusu ilə bərabər dövlət də məsuliyyət daşıyır. Çünki dövlət qulluqçusu dövlətin əməkdaşıdır və dövlətin adından hərəkət edir. Bu baxımdan artıq dövlət qulluqçularının mülki məsuliyyəti yaranır".