İyulun 13-də Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda keçirilən IV Şuşa Qlobal Media Forumu növbəti dəfə Azərbaycanın regionda təşəbbüskar və lider, faydalı dialoqlara hədsiz dərəcədə açıq və iradəli mövqeyini nümayiş etdirdi.
Prezident İlham Əliyevin dörd saata yaxın müddətdə müxtəlif dövlətlərin nüfuzlu media orqanlarının suallarını əhatəli və dolğun şəkildə cavablandırması, hadisələrə yeni baxış rakursundan şərh verməsi ilk növbədə, Azərbaycan Liderinin azad sözə və fikrə olan yüksək münasibətini əks etdirir. Forumun mövzusundan göründüyü kimi, Azərbaycanın regionda yaratdığı reallıqlar həqiqətin bərpası və etimadın yenidən qurulmasında başlıca rol oynamaqdadır və bu həqiqətləri 53 ölkədən 160-a yaxın media nümayəndəsi, ekspert və rəsmi şəxs görür, qlobal informasiya auditoriyasına təqdim edir.
Forumun ideyası maraq doğuran məsələləri, qarşılıqlı surətdə narahatlıq doğuran sualları müzakirə etmək, həmçinin Qarabağ və Şuşa ilə tanış olmaq məqsədilə dünyanın müxtəlif guşələrindən media nümayəndələri üçün mühit yaratmaqdan ibarətdir. Bu baxımdan, Forum xarici media orqanları üçün Azərbaycan və Qarabağ haqqında əsl gerçəklikləri, baş verən müsbət dəyişiklikləri və inkişaf edən hadisələri yerindəcə izləməklə həqiqətlərin beynəlxalq auditoriyaya çatdırılmasında unikal fürsət yaradır.
İndi Qarabağa səfər edən media nümayəndələri mükəmməl quruculuq meydançasını, əsrarəngiz memarlıq üslubu ilə inşa edilən şəhərləri, yeni salınmış mənzillərdə yaşayan insanları görürlər.
Möhtərəm Prezidentimizin də qeyd etdiyi kimi, “bu, müxtəlif meyarların kombinasiyasıdır. Birincisi, hər dəfə, hər il Forumun mövzusu sadəcə cari çağırışları əks etdirir. İkincisi, mühit çox mehriban, çox müsbətdir və müxtəlif mediadan olan bir çox insanlar, əminəm ki, Şuşada görüşlərdən sonra yaxın dostlara çevrilirlər. Əlbəttə ki, bizim üçün mühüm meyar qərarların qəbul edilməsi prosesinə təsir göstərən, öz ölkələrində və onun hüdudlarından kənarda ictimai rəyi formalaşdıran insanlardan ibarət böyük qrupu toplamaqdır və Qarabağın öz köklərinə qayıtmasını, bu torpaqların yiyələrinin qayıtmasını, real inkişafı göstərməkdir”.
Beləliklə, mövcud mənzərəni heç kimə izah etməyə ehtiyac qalmır, dünya media icması özü hadisələrin mərkəzindədir. Bu yaradılmış imkanlar isə ölkəmizin mediaya nə qədər açıq olduğunu, demokratik informasiya mühiti təmin etdiyini təsdiqləyir.
Forumda Prezident İlham Əliyev regional və beynəlxalq təhlükəsizlik, Cənubi Qafqazın geosiyasi durumu və Azərbaycan-Ermənistan sülh prosesində əldə edilən müsbət dəyişikliklər, trans-nəqliyyat və enerji dəhlizlərində ölkəmizin oynadığı mühüm rol, dünyada artan risklər fonunda güclü sabitliyin əhəmiyyəti və digər məsələlərə özünəməxsus analitik yanaşması ilə qiymət verməklə bir daha ədalətli və obyektiv mövqeyini təsdiqlədi.
Forumda diqqət çəkən mühüm amillərdən biri Azərbaycanın geosiyasi və geoiqtisadi mühitdə mövqeyinin son dövrlərdə daha da güclənməsi ilə bağlı oldu. Xarici media təmsilçilərinin ünvanladıqları suallara verilən cavablarda ölkəmizin beynəlxalq enerji-nəqliyyat dəhlizlərinin təşəbbüskarı və müəllifinə çevrilməsi, Cənubi Qafqaz, Xəzər və Mərkəzi Asiya regionunda etibarlı mövqe tutması barədə ətraflı məlumat verildi.
Cənab İlham Əliyevin bəyan etdiyi kimi, qonşularla qarşılıqlı əlaqələr olmadan, heç zaman tranzit ölkəyə çevrilmək mümkün deyil. Azərbaycan bölgənin nəqliyyat arxitekturasının zənginləşməsinə illərlə irihəcmli sərmayələr yönəldib, əsaslı modernləşdirmə quruculuğu həyata keçirib. 10 ildən artıq yorulmadan çalışaraq öz coğrafi mövqeyi və üstünlüklərindən istifadə etməklə çoxtərəfli əməkdaşlıq üçün real platforma yaradıb. Avrasiyanın böyük coğrafi məkanında, Şərq və Qərb, Şimal və Cənub istiqamətlərdə geniş beynəlxalq əməkdaşlığı qurmaq, çoxtərəfli enerji alyansı yaratmaq məhz bu qətiyyətin, sarsılmaz quruculuğun sayəsində ərsəyə gəlib.
Regional əməkdaşlığın nümunəvi formatlarıdan biri də Mərkəzi Asiya-Azərbaycan vahid iqtisadi və siyasi məkanın formalaşdırılmasıdır. Bu yeni birlik bağlantılar, nəqliyyat, logistika layihələrinin icrası istiqamətində mühüm fayda verir və Avrasiya körpüsündə Azərbaycanın strateji yerini gücləndirir, Özbəkistan, Qazaxıstan və digər ölkələrlə fəal təmaslar qlobal kommunikasiyaların ritmini artırır.
Regionun kommunikasiya xəritəsini zənginləşdirən Azərbaycan, eyni zamanda, Türk Dövlətləri Təşkilatının Şuşada keçirilən qeyri-rəsmi Zirvə görüşündə imzaladığı Qarabağ Bəyannaməsinin ən mühüm hədəfi olan Orta Dəhlizə inteqrasiyanın gücləndirilməsinə töhfələr verir. Artıq XXI əsrin İpək Yolu sayılan Orta Dəhliz ailəsinin coğrafi hüdudları genişlənir, Çindən Azərbaycana və əks istiqamətdə tranzit həcmləri artır. Azərbaycandan Çinə və əks-istiqamətdə qatarının hərəkəti isə ölkəmizin həm ixrac potensialını, həm də tranzit ölkə olaraq regional əhəmiyyətini ötən il daha da artırıb və nəqliyyat infrastrukturumuz Orta Dəhlizə tam inteqrasiya olunub.
Azərbaycan Dəmir Yolu, Abşeron Logistika Mərkəzi, Bakı Beynəlxalq Dəniz Ticarət Limanı və “Azərbaycan Xəzər Dəniz Gəmiçiliyi” də bu logistika zəncirinə qoşulub. Dəniz Ticarət Limanı bu gün 15 milyon ton imkanı ilə Xəzərdə ən iri limandır və həcmin 25 milyon tona çatdırılması istiqamətində fəal işlər aparılır. Eləcə də Avropaya və geriyə yükləri daşımaq üçün öz Gəmiqayırma zavodunda 10 gəmi inşa olunur ki, tranzit pozulmalarının baş verdiyi bir dövrdə, Azərbaycanın mərkəzi körpüyə çevirərək daha cəlbedici edir. Bir sözlə, həmin meyarlar Azərbaycanın əhəmiyyətini birmənalı şəkildə artırır.
Ölkəmizin yaratdığı yeni reallıqlar fonunda bölgənin coğrafiyası və logistika xəritəsi dəyişir, Zəngəzur dəhlizinin Orta Dəhliz zəncirinə qoşulması üçün səylər gücləndirilib. Zəngəzur dəhlizi vacib layihə kimi təkcə Azərbaycanla Naxçıvan Muxtar Respublikasını birləşdirməyəcək, Cənubi Qafqazda iqtisadi əməkdaşlığın genişlənməsinə, beynəlxalq yükdaşımaların sürətlənməsinə və regionun tranzit potensialının daha da güclənməsinə töhfə verəcək.
Beləliklə, Şuşa Forumu regional və beynəlxalq proseslərin ali tribunası, geniş təqdimat platforması, informasiya və media diplomatiyasının uğuru olaraq xarakterizə edilə bilər.

Ramid Namazov
Milli Məclisin deputatı