“Ermənistan beynəlxalq hüquq pozuntularına son qoymalıdır” Siyasət

“Ermənistan beynəlxalq hüquq pozuntularına son qoymalıdır”

Britaniyalı deputat Qarabağda atəşkəs rejiminin pozulmasından narahatdır

Böyük Britaniya Leyborist Partiyasının ölkə parlamentdəki üzvü Cerri Sütklif (Gerri Sutkliffe) Ermənistan-Azərbaycan, Dağlıq Qarabağ münaqişəsi ətrafında yaranmış duruma şərh verib.
Avropa Azərbaycan Cəmiyyətindən APA-ya verilən məlumata görə, C. Sürklif bildirib ki, son günlər münaqişə zonasında Azərbaycan Silahlı Qüvvələrinin 10-dan çox hərbçisi həlak olub, 2 azərbaycanlı mülki şəxs isə qanunsuz olaraq həbs edilib: "Azərbaycana məxsus olan ərazilər qaytarılmalı və 1 milyona yaxın azərbaycanlı məcburi köçkünə öz evlərinə geri dönmək üçün imkan verilməlidir. Mən Azərbaycanda səfərdə olan zaman məcburi köçkünlərin məskunlaşdığı düşərgələrə baş çəkib, onların şəraiti ilə yaxından tanış olmuşam. Azərbaycan hökumətinin məcburi köçkünlər üçün rahat yaşayış şəraiti yaratmaq üçün səy göstərdiyi zaman yenə də bu insanların ən böyük arzusu öz evlərinə qayıtmaqdır. Ermənistan buna dair öz öhdəlikləri ilə bağlı ölçü götürməli və yol verdiyi beynəlxalq hüquq pozuntularına son qoymalıdır".
Qeyd edək ki, C. Sütklif sonuncu Leyborist hökumətində davamlı və nəzərə çarpan siyasi karyera qurmağa müvəffəq olub.
O, ədliyyə və idman naziri olmaqla yanaşı, Ticarət və Sənaye Departamentində yüksək vəzifələrdə çalışıb.