İspaniyanın böyük oxucu kütləsinə malik olan "La Razon" qəzetində ölkəmizdə keçirilmiş növbədənkənar parlament seçkilərinə həsr olunmuş "Azərbaycanda keçirilmiş parlament seçkilərində Yeni Azərbaycan Partiyası qalib gəldi" sərlövhəli məqalə dərc olunub. məqalədə 2020-ci il fevralın 9-da Azərbaycan Respublikası Milli Məclisinə keçirimiş seçkilərin dövlətin Konstitusiyası, Seçki Məcəlləsi və Azərbaycanın beynəlxalq öhdəliklərinə tam uyğun olaraq baş tutduğu qeyd olunur. Məqalədə bildirilir ki, 2020-ci il 9 fevral seçkilərində indiyədək parlament seçkilərində qeydə alınmış ən yüksək sayda - 1314 namizəd mübarizə aparmış, bu da öz növbəsində namizədlərin qeydiyyatı prosesinin əhatəli və ədalətli olduğunun, eləcə də rəqabətli seçki mühitinin göstəricisidir. Seçkilər, habelə bundan əvvəlki seçkilərlə müqayisədə qeydə alınmış qadın namizədlərin sayının əhəmiyyətli dərəcədə artması, 19 siyasi partiya namizədinin təmsil olunması ilə geniş plüralizmin təmin edilməsi kimi məqamlarla əlamətdar olmuşdur. Xüsusi olaraq vurğulanır ki, Ermənistanın təcavüzü nəticəsində Azərbaycanda mövcud 125 seçki dairəsindən 7-nin ərazisinin tamamilə, 3-nün isə qismən işğal edilməsi səbəbindən, həmin ərazilərdən didərgin salınmış məcburi köçkünlərin konstitusion səsvermə hüquqlarından istifadə etmələri üçün ölkə ərazisində 523 seçki məntəqəsi yaradılıb. Seçki prosesinin Azərbaycan tərəfinin dəvəti ilə ölkəyə gəlmiş 883 beynəlxalq və 78 minə yaxın yerli müşahidəçi tərəfindən izlənildiyi, həm beynəlxalq, həm də yerli müşahidəçilərin mütləq əksəriyyəti seçkilərin azad, demokratik və şəffaf şəraitdə keçdiyini təsbit etdikləri diqqətə çatdırılır.
Məqalədə vurğulanır ki, fevralın 9-da keçirilən parlament seçkiləri Azərbaycan Respublikasının demokratik inkişafı yolunda növbəti önəmli mərhələnin təzahürüdür.