Bahar Muradova: "Onların əsas istəyi özündən razı olan kiçik bir dövlət kimi bizi cəzalandırmaqdır"

"Öz optimist siyasətimizi bizə qarşı təzyiqlərin əlinə vermək düzgün deyil. Əgər şübhə olacaqsa, o zaman bununla da biz onların torlarına düşmüş olacağıq".
Bu barədə vitse-spiker Bahar Muradova Milli Məclisin dünənki iclasında da son zamanlar Azərbaycanla bağlı beynəlxalq qurumların atdığı addımları qiymətləndirərkən deyib. Onun sözlərinə görə, Avropa Parlamenti və digər sifarişli qərar qəbul edən beynəlxalq qurumların təzyiqləri kampaniya xarakterlidir: "Beynəlxalq təşkilatlarda iştirak edən və ən çox rəsmi şəxslərlə görüşən biri olaraq deyə bilərəm ki, qırmızı xətlə keçən bir fikir var ki, Azərbaycan özündən razı siyasət yeridir. Bu fikirdə olanlar bizim müstəqil siyasətimizi özündən razılıq kimi qəbul edirlər. Onların əsas istəyi özündən razı olan kiçik bir dövlət kimi bizi cəzalandırmaqdır. Digər tərəfdən, bu kimi addımlar onların qarşılarında alət olmamağımızdan irəli gəlir. Təbii ki, bu fərqi ayırd etmək elə də çətin deyil. Azərbaycan müstəqil ölkədir. Nə qədər ki, ölkəmizdə müxtəlifyönlü QHT-lər fəailiyyət göstərir, o zamana kimi belə siyahılar olub və bundan sonra da olacaq".
B. Muradova qeyd edib ki, Azərbaycanın tutduğu yola heç kimin şübhəsi olmamalıdır: "Bizim əsas istəyimiz odur ki, Azərbaycanda bu sahədə şəffaflıq olsun. Hər kəsin maliyyə qaynaqları açıq şəkildə göstərilməlidir. Ölkədəki QHT-lərin fəaliyyətinə sərf etdiyi maliyyə barədə hesabat verməyin zəruridir. Dövlət qurumlarının qrant alması ilə bağlı deyilən fikirlərlə razılaşmaq olmaz. Digər və haqqında danışdığımız bizi narahat edən qurumlardan fərqli olaraq, hökumət qurumları açıq və şəffaf şəkildə bu kimi qrantları alırlar. Ona görə də hansısa marağımıza görə heç bir hökumət təşkilatlarımızın xarici dairələrin əlində siyasi və başqa alətə çevrilməsinə dözə bilmirik".