Nəsib Məhəməliyev: “Karantin rejiminin qaydalarına riayət olunmalıdır”

“Ermənistan silahlı qüvvələrinin Tovuz rayonu istiqamətində törətdiyi təxribatlar və Ordumuzun düşmənə layiqli cavab verməsi, Azərbaycan cəmiyyətində vətənpərvərlik hisslərini alovlandırdı. Minlərlə vətənpərvər gənclərimiz Ali Baş komandana və Ordumuza dəstək məqsədilə küçələrə axışdı. Ancaq biz qətiyyən unutmamalıyıq ki, koronovirus pandemiyası davam edir və bu ermənilərdən daha güclü düşməndir”. Bunu “Xalq cəbhəsi”nə açıqlamasında millət vəkili Nəsib Məhəməliyev bildiirb. Millət vəkili əlavə edib ki, gec-tez erməni adlı alçaq, xain, riyakar düşmənin cəzasını verəcəyik: “İndiki halda, bütün dünyanı bürümüş Covid-19- a qalib gəlməliyik ki, milli kimliyimizi, dövlətçiliyimizi qoruyub saxlayaq. Hesab edirəm ki, millət olaraq emosiyalarımıza sahib çıxmalı, soyuqqanlılığımızı qorumalıyıq. İlk növbədə bütün kütləvi tədbirlər razılaşdırılmalı, karantin rejiminin qaydalarına riayət olunmalıdır. Əks halda bu gecə Milli Məclisin binasında baş vermiş hadisələr bir daha göstərdi ki, hələ də xalqımızın vətənpərvərlik hisslərindən öz çirkin məqsədləri üçün istifadə etmək istəyən,təxribatçı qüvvələr var.
Belə xaotik kütləvi tədbirlər virusun daha sürətlə yayılması üçün münbit şərait yaradır. Düşmənə də bu lazımdır. Dəfn mərasimlərində isə daha diqqətli olmaq lazımdır. Sosial məsafə, tibbi maska mütləqdir. Mentalitetə görə yas mərasimlərində qucaqlaşmaq isə yol verilməzdir. Əgər minlərlə insanın nizamsız şəkildə toplaşmasının qarşısı alınmasa, pandemiyanı nəzarətdə saxlamaq mümkün olmaz”.

Əli Zülfüqaroğlu