Nurlan Qələndərli: “Azərbaycan Silahlı Qüvvələri 44 günlük Vətən müharibəsində XXI əsrin savaşını apardı”

“Azərbaycan dünya miqyasında spesifik strateji inkişaf modelinə görə fərqlənən ölkələr sırasında yer alır. Bütün sahələrdə olduğu kimi, ordu quruculuğu istiqamətində də görülən məqsədyönlü işlər ölkəmizin milli gücünün artmasını şərtləndirir. Xüsusi vurğulamaq gərəkdir ki, bu sahədə atılan kompleks addımlar Azərbaycan Ordusunun dünyanın ən güclü orduları sırasında yer almasını təmin edib”. Bu fikirləri "Xalq cəbhəsi"nə açıqlamasında politoloq Nurlan Qələndərli deyib.
Onun sözlərinə görə, ölkədə müdafiə sənayesinin yaradılması, ordunun ən müasir silahlarla təchiz olunması, peşəkar və vətənpərvər kadr potensialının formalaşdırılması strateji əhəmiyyət daşıyır: “Azərbaycan Ordusu öz gücünü döyüş meydanında göstərib. Azərbaycan Silahlı Qüvvələri 44 günlük Vətən müharibəsində XXI əsrin savaşını apardı, tarixi qələbə qazanaraq ölkəmizin ərazi bütövlüyünün bərpasına nail olmaqla yeni zəfər salnaməsi yaratdı və öz tarixi-strateji missiyasını uğurla yerinə yetirmiş oldu. Bu gün hər bir azərbaycanlı haqlı olaraq öz qüdrətli dövlətinin qalib ordusu ilə fəxr edir”.

Əli Zülfüqaroğlu